Qazaqstanda jańa kóbelek túri anyqtalyp, oǵan Manash Qozybaevtyń esimi berildi
PETROPAVL. KAZINFORM – Kóbelektiń ǵylymǵa buryn belgisiz bolǵan jańa túri Shyǵys Qazaqstandaǵy Arqaly taýlarynan tabylǵan.
Jándikke qazaqstandyq tarıhshy, akademık Manash Qozybaevtyń esimi berildi. Osylaısha, ǵalymnyń aty halyqaralyq zoologııalyq nomenklatýrada máńgilikke saqtalmaq.
Bul jańalyq akademıktiń týǵanyna 95 jyl tolýyna oraı Qozybaev ýnıversıtetinde ótip jatqan saltanatty kezdesýde jarııalandy. Ǵalymnyń mereıtoıy 16 qarashada atalyp ótedi.
Kozybayev University baspasóz qyzmetiniń málimetinshe, kóbelektiń jańa túri Scythobrya kozybayevi dep ataldy. Onyń ǵylymı sıpattamasy 12 qarashada halyqaralyq Entomological Studies jýrnalynda jarııalanǵan. Jańa túrdi Qazaqstan men Ulybrıtanııa entomologtary birlesip zerttegen. Ǵylymı jumystyń avtorlary – Sergeı Tıtov pen Anton Volynkın.
Zertteýshilerdiń málimetinshe, býnaqdeneli tún kóbelekteri tuqymdasyna jatatyn Noctuidae tobynyń Bryophilinae tarmaǵyna kiredi.
- Kóbelektiń jańa túrine Manash Qozybaevtyń esimin berý arqyly onyń ǵylymǵa sińirgen eńbegine qurmet kórsetýdi maqsat ettik. Ol ǵylymı obektıvtilik pen tarıhı shyndyq qaǵıdattaryn únemi berik ustandy. Ǵalymnyń eńbekteri elimizdiń zııatkerlik murasynyń ajyramas bóligine aınalyp, búgingi jáne keleshek zertteýshiler úshin baǵyt-baǵdar bolyp keledi, - deıdi ǵalymdar.
Bul jańalyq Qozybaev ýnıversıteti úshin de aıryqsha mánge ıe. Soltústik Qazaqstan ýnıversıtetine 2003 jyly akademıktiń esimi berilgen. Sodan beri oqý orny ǵalymnyń ǵylymı murasyn dáriptep, onyń ǵylym men bilimge qyzmet etý dástúrin jalǵastyryp keledi.
Buǵan deıin Astanada Zýqa batyrdyń 160 jyldyǵyna arnalǵan halyqaralyq ǵylymı semınar ótetinin jazǵan edik.