Qazaqstanda jańa kıberqaýipsizdik standarttary engiziledi
ASTANA. KAZINFORM – Qazaqstanda derekter men tsıfrlyq ınfraqurylymdy qorǵaýdy kúsheıtýge baǵyttalǵan jańa ulttyq standarttar bekitildi, dep habarlaıdy QazStandart.
23 aqpanda QazStandart alańynda aqparattyq qaýipsizdik salasyndaǵy standarttardy engizýge arnalǵan onlaın dóńgelek ústel ótti. Іs-sharaǵa memlekettik organdar, ákimdikter, salalyq qaýymdastyqtar, kompanııalar men sarapshylardan 70-ke jýyq ókil qatysty.
Kezdesý barysynda 2025 jyly ázirlengen birqatar ulttyq standarttar talqylandy. Atap aıtqanda, QR ST ISO/IEC 15408-4-2025 jáne QR ST ISO/IEC 15408-5-2025 standarttary aqparattyq tehnologııalar qaýipsizdigin baǵalaý talaptaryn belgileıdi. Sondaı-aq QR ST 4011-2025 standarty baǵdarlamalyq qamtylymdy qaýipsiz ázirleýge qoıylatyn negizgi talaptardy aıqyndaıdy.
Dóńgelek ústel ashyq dıalog formatynda ótti. Qatysýshylar jańa qujattardy qoldanýdyń praktıkalyq máselelerin talqylap, sarapshylardyń túsindirýlerin tyńdady. Іs-sharaǵa Memlekettik tehnıkalyq qyzmet AQ jáne ESSL JShS ókilderi qatysty.
ISO/IEC 15408 serııasynyń standarttary buryn qabyldanǵan qujattardy tolyqtyryp, aqparattyq tehnologııalardyń qaýipsizdigin baǵalaýdyń biryńǵaı júıesin qalyptastyrady. Olar baǵalaý sharttaryn, aqparattyq júıelerge senim deńgeılerin aıqyndaıdy jáne memlekettik qupııamen jumys isteıtin júıelerdi qosa alǵanda, memlekettik júıelerge qoldanylady.
Al QR ST 4011-2025 standarty baǵdarlamalyq ónimderdegi osaldyq táýekelderin azaıtýǵa baǵyttalǵan jáne qaýipsiz ázirleýdi uıymdastyrý talaptaryn bekitedi.
QazStandart málimetinshe, jańa standarttardy engizý aqparatty qorǵaýdyń biryńǵaı ári túsinikti tásilin qalyptastyrady. Bul kıberqaýipsizdik salasynda júıeli jumysty jolǵa qoıýǵa jáne otandyq tsıfrlyq sheshimderge degen senimdi arttyrýǵa múmkindik beredi.
Sarapshylardyń baǵalaýynsha, standarttardy qoldaný tsıfrlyq ortanyń turaqtylyǵyn kúsheıtip, asa mańyzdy derekterdi qorǵaýǵa jáne sheteldik tehnologııalyq sheshimderge táýeldilikti azaıtýǵa yqpal etedi.
Aıta keteıik, Qazaqstan aqparattyq qaýipsizdik pen tsıfrlyq júıelerge jańa talaptar engizdi.