Qazaqstanda jańa kásiptik standarttar ázirlenedi

ASTANA. QazAqparat – Qazirgi kezde Qazaqstanda 600-den astam kásiptik standart bekitilgen. Bul týraly Májiliste zań jobasyn tanystyrý kezinde QR Eńbek jáne halyqty áleýmettik qorǵaý vıtse-mınıstri Oljas Ordabaev aıtty, dep habarlaıdy QazAqparat tilshisi.

Onyń aıtýynsha, elimizde taǵy 400 kásiptik standartty ázirleý eskerilgen. 2030 jylǵa deıin bul standarttar daıarlanady dep josparlanyp otyr.

Eńbek jáne halyqty áleýmettik qorǵaý mınıstrligi málimetinshe, qazirgi kezde 623 kásiptik standart bar. Olar 2689 mamandyqty qamtyp otyr. Bul standarttarda belgilengen talaptar negizinde bilim berý uıymdary tıisti bilim baǵdarlamalaryn ázirleıdi. Osy oraıda jumys berýshilerdiń talaptaryna sáıkes keletin kadrlardy daıarlaý qamtamasyz etiledi.

Budan buryn habarlanǵandaı, byltyr bilim berý baǵdarlamalarynyń 64 paıyzy kásibı standarttardy eskere otyryp jańartylǵany málim boldy.