Qazaqstanda jańa fýtbol komandasy paıda boldy

ASTANA. KAZINFORM — Taraz qalasynda jańa fýtbol komandasynyń qurylǵany belgili boldy. Komanda Qazaqstan chempıonatynyń Ekinshi lıgasynda qala namysyn qorǵaıdy, dep habarlaıdy Kazinform tilshisi.

Qazaqstan fýtbol chempıonatynyń Birinshi lıgasynda óner kórsetip júrgen «Taraz» fýtbol klýbynyń resmı akkaýntynda óńirde taǵy bir jańa komandany qurý jumystary bastalǵany týraly habar jarııalandy. Atalǵan komanda el birinshiliginiń Ekinshi lıgasynda jarys jolyna shyǵady.

— Bıyl «Tarazda» ekinshi lıga komandasy jasaqtalady. Birinshi lıgamen qatar, endi ekinshi lıgaǵa da óz komandamyz qosylyp, óner kórsetetin bolady. Bul — jergilikti jastarǵa tamasha múmkindik ári úlken fýtbolǵa jol ashatyn dáliz. Osylaısha «Taraz» komandalary QJ League – Jasóspirimder lıgasynda, Ekinshi jáne Birinshi lıgada óner kórsetedi, — delingen «Taraz» fýtbol klýbynyń resmı habarlamasynda.

Buǵan deıin «Taraz» klýbynyń dırektory Dıdar Sydyqbek ashyq túrde «Qaırattan» almatylyq klýbtyń túlegi, 18 jastaǵy qaqpashy Sherhan Qalmyrzany satyp alý jóninde resmı suranys joldaýdy josparlap otyrǵanyn málimdegen edi. Alaıda «Qaırat» basshylyǵy mundaı usynystardyń talqylaýǵa da jatpaıtynyn aıtty.

Osydan buryn Dinmuhambet Súleımenov «Taraz-Omega» fýtzal klýbyna bas bapker bolǵanyn jazǵan edik.