Qazaqstanda jańa formatta jastarǵa arnalǵan «Meniń armanym» konkýrsy ótkizilmek

Jastarǵa arnalǵan saıystyń ótkizilýine QR Bilim jáne ǵylym mınıstrligi muryndyq bolyp otyr. Mınıstrliktiń ókili Bolatbek Abdrasılovtyń aıtýynsha, baıqaýǵa qatysý úshin Qazaqstannyń barlyq aımaqtarynan qyrkúıek aıynyń basyna deıin ótinimder qabyldanady. Konkýrstyń basty maqsaty - Qazaqstan jastarynyń áleýmettik belsendiligin, synı jáne shyǵarmashylyq turǵyda tereń oılaýyn damytý. Negizgi mindetteri boıynsha Elbasynyń «Rýhanı jańǵyrý: Bolashaqqa baǵdar» maqalasynda belgilengen baǵyttaǵy jobalardy qoldaý úshin ótkizilmek.

«Bul joba - jastardy qoldaıtyn erekshe konkýrs bolaıyn dep tur. Konkýrs ıntellektýaldy shoý retinde «Habar» agenttigi arqyly kórsetiledi. Bes baǵyt boıynsha: bilim, tehnologııalar, ekologııa, áleýmet, mádenıet salasynyń máseleleri boıynsha ótinimder qabyldanady. Mundaı jańa formattaǵy konkýrs tuńǵysh ret uıymdastyrylmaq», - deıdi Bolatbek Abdrasılov. 

Al «Rýhanı jańǵyrý» baǵdarlamasynyń basqarma keńsesiniń basshysy Arman Evnıevtyń sózine súıensek, joba jastarǵa áleýmettik-ınovatsııalardy tabýdyń jolyn ashyp beredi. Ádil qazylar tańdap alǵan 64 joba «Habar» arnasynan kórsetiletin ıntellektýaldyq shoýǵa qatystyrylady.

Sondaı-aq, baspasóz máslıhaty barysynda «SUCCESS K» strategııalyq kommýnıkatsııalar agenttiginiń bas dırektory Lázzat Kókkózova jobanyń ereksheligin atap ótti.

«Áriptesterim aıtqandaı, bul áleýmettik joba ǵana emes, munda kez kelgen jas qazaqstandyq úshin óz armanyn iske asyrýǵa múmkindik týyp otyr. Qatysýshynyń jobasy qoǵamǵa mańyzdy bolýy kerek. Ekinshiden, jurtty erekshe qyzyqtyra bilýi tıis. Úshinshiden, onyń qarjylyq áleýeti men turaqtylyǵyna basa mańyz beriledi. Jastar aınalasyn baǵamdap, standartty máselelerdi qalaısha qarapaıym jolmen sheshýdi bilýi tıis», - deıdi Lázzat Kókkózova.

Konkýrsqa ótinimderdi www.meninarmanym.kz saıty arqyly joldaýǵa bolady.

                                                               Aıan Óribaı