Qazaqstanda jańa energetıka qýatyn iske qosý ózekti máselege aınalyp otyr

ASTANA. KAZINFORM — Astanada steıkholderler forýmy bastaldy. Onda Qazaqstannyń atom energetıkasyn damytýdyń ózekti máseleleri men AES salý múmkindikteri talqylanyp jatyr.

«Qazaqstandyq atom elektr stantsııalary» JShS jáne QR Energetıka mınıstrligi muryndyq bolǵan is-sharaǵa atom energetıkasy salasyndaǵy jetekshi mamandar men sarapshylar, ekologtar, ÚEU, bıznes, akademııalyq orta jáne memlekettik sektor ókilderi qatysýda.

Mamandar bir pikirtalas alańynda jınalyp, atom salasyn damytýdyń ózekti máselelerin, onyń ishinde AES salý múmkindikterin talqylaýǵa kiristi.

Forýmnyń paneldik otyrystary Qazaqstan energetıkasynyń qazirgi jaǵdaıy, el ekonomıkasynyń turaqty damýyn qamtamasyz etýdegi atom energetıkasynyń róli, onyń qorshaǵan ortaǵa áseri men áleýmettik aspektilerine arnalmaq.

«Ózderińiz biletindeı, Qazaqstanda jańa energetıkalyq qýatty iske qosý qajettiligi ózekti máselege aınalyp otyr. Bul — elektr energııasyn tutynýdyń ósýi men jumys istep turǵan stantsııalardaǵy generatsııalaýshy jabdyqtyń tozýyna baılanysty. Qazaqstan Úkimetiniń kómirtegisiz energetıkaǵa kóshý baǵyty, sondaı-aq elimizde shıkizat pen óndiristik bazasynyń bolýy, respýblıkada atom energetıkasy salasyn damytý úshin barynsha tıimdi jaǵdaı jasaıdy» — dedi «Qazaqstan atom elektr stantsııalary» JShS bas dırektory Tımýr Jantıkın.

Onyń aıtýynsha, Qazaqstanda atom elektr stansasyn salý — eldiń ındýstrııalyq damýyna qajetti eń ońtaıly da tıimdi sheshim.

Sonymen qatar ol ekonomıkanyń barlyq salalarynyń damýyna yqpal etedi.