Qazaqstanda jańa býyn ınjenerleri daıarlanyp jatyr
ASTANA. KAZINFORM – Qazaqstan jastary shetelge shyqpaı-aq zamanaýı tehnologııalar, jasandy ıntellekt jáne tsıfrlyq transformatsııa salalarynda bilim alýda. Mundaı múmkindik L.N. Gýmılev atyndaǵy Eýrazııa ulttyq ýnıversıtetiniń bazasynda ashylǵan Lý Ban sheberhanasynda usynylǵan.
Sheberhana tsehtarynda ónerkásiptik robottar bar. Injener Nurbolat Ahmetjanovtyń aıtýynsha, qondyrǵylar kúrdeli operatsııalardy oryndaıdy: mysaly, olardyń kómegimen avtomobıldiń qanaty sııaqty bólshekter kesiledi. Avtomattandyrýǵa erekshe kóńil bólinedi. Robottandyrylǵan jeliler flesh-jınaqtaýyshty 4 mınýtta qurastyrady: bólshekter korpýsqa ornalastyrylady, jady ornatylady, qaqpaǵy jabylady jáne bekitkishteri buralady. Barlyq operatsııalar avtonomdy túrde, belgilengen algorıtm boıynsha jáne qatań rettilikpen oryndalady.
Stýdentter jabdyqtardyń jumysyn jaı ǵana baqylamaıdy. 30-ǵa jýyq bilim alýshy óz jobalaryn ázirlep úlgerdi. Olardyń qatarynda qashyqtan basqarylatyn robottar da bar. «Ol qashyqtan jumys isteıtindikten, oǵan kıbershabýyl jasalýy múmkin», — dep túsindiredi tilshi Anýar Karbozov. Mundaı qurylǵylardy qorǵaý úshin stýdentter arnaıy qaýipsizdik baǵdarlamalaryn ázirledi. Sonymen qatar sheberhanada drondardy basqarý boıynsha oqytý júrgiziledi. Bolashaqta olar medıtsınada, tasymaldaý, jetkizý jáne aýyl sharýashylyǵy salalarynda qoldanylady.
EUÝ-dyń tsıfrlandyrý jónindegi prorektory Gúlmıra Bekmanova tásilderdiń aıyrmashylyǵyna toqtaldy: «IT mamandyqtarynda negizinen kompıýterlik baǵdarlamalaýmen aınalysady. Al munda stýdentter ártúrli jabdyqtardy baǵdarlamalaýdy, olardy óndiriste qalaı qoldaný kerektigin túsinýdi jáne olarmen jumys isteýdi úırenedi».
Sheberhana ashylǵannan beri onda 4 myńnan astam stýdent praktıkadan ótti. Búginde tehnıkalyq kadrlar elimizdiń birden úsh óńirinde daıarlanýda: Lý Ban sheberhanalary Óskemen, Astana jáne Almaty qalalarynda tabysty jumys istep, Qazaqstandy jańa býyn ınjenerlerimen qamtamasyz etýde.
