Qazaqstanda jańa baspana teńgemen satylady
ASTANA. QazAqparat - Úkimet pen Ulttyq bank kóp kúsh-jigerin jumsap, jumys isteıtin eki baǵyt bar. Birinshi baǵyt - ekonomıkany dollarsyzdandyrý, ıaǵnı, eń aldymen, ulttyq aqshamyzdyń qoldanysyn keńeıtý. Al ekinshi baǵyt - qazaqstandyq bankterden azamattardyń teńgemen nesıe alý múmkindikterin arttyrý. Osy eki máseleni oń sheshetin bolsaq, elimizdiń ekonomıkasy baǵamdyq saıasatqa meılinshe azyraq nazar aýdarady. Kerisinshe, ınflıatsııanyń mólsherlemesine kóbirek kóńil bóledi,-dep málimdedi aǵymdaǵy jyldyń 20 tamyzynda Ortalyq kommýnıkatsııalar qyzmetindegi baspasóz máslıhatynda QR-nyń Premer-Mınıstri Kárim Másimov.
Úkimet basshysynyń usynysyn Qazaqstan qurylysshylar qaýymdastyǵy (QQQ) birinshi bolyp qoldady. Ol otandyq turǵyn úı naryǵyn dollarsyzdandyrý týraly sheshim qabyldady. Sheshimge sáıkes, qaýymdastyqqa múshe kompanııalar jyljymaıtyn múlik nysandaryn salý men satý kezinde dollardan bas tartyp, tek teńgeni qoldanady. QQQ-nyń baspasóz qyzmeti habarlaǵandaı, budan bylaı qaýymdastyq músheleri jańa turǵyn úılerdiń baǵasyn teńgemen belgileıdi. Turǵyn úı qurylysy naryǵyndaǵy basqa da qatysýshylarǵa týra osyndaı talap qoıylady.
«Qaýymdastyq ulttyq aqshanyń basymdyǵyn arttyrý maqsatynda qurylys materıaldaryn jetkizýshiler jáne qyzmet túrlerin usynýshylarmen aradaǵy óz qarym-qatynasyn qaıta qaraıdy. Mundaı qadam ınflıatsııalyq targetteýge, baspananyń ár sharshy metriniń qunyn ósirýdi tejeýge septigin tıgizedi. Qurylys materıaldaryn jetkizýshilerdi tańdaǵan kezde dollardan táýelsiz, qazaqstandyq mazmuny joǵary otandyq kompanııalarǵa basymdyq beriledi»,- delingen baspasóz qyzmeti taratqan Qazaqstan qurylysshylar qaýymdastyǵynyń tóraǵasy Aıdyn Rahymbaevtyń túsiniktemesinde.
Sondaı-aq, A. Rahymbaev Qazaqstannyń jańa aqsha-nesıe saıasatyna kóshýi jańa baspana qunynyń ósýine ákelip soqtyrǵanyn atap aıtty. Mysaly, aǵymdaǵy jyldyń tamyz aıynda shildemen salystyrǵanda baspana baǵasy 4,2 paıyzǵa artqan. Endeshe teńgeniń erkin aıyrbas baǵamyna ótýi turǵyn úıdiń baǵasynyń arzandaýyna yqpal etedi. Osyǵan oraı QQQ-nyń atqarýshy dırektory Aslan Túkıev: «Bizdiń qaýymdastyq turǵyn úı naryǵyndaǵy rıeltorlardy, kásibı birlestikter men basqa da múddeli uıymdardy baǵany dollarmen qalyptastyrýdan túbegeıli bas tartyp, ulttyq aqshamyzǵa basymdyq berýge shaqyrady» dep málimdedi.
Atalǵan qaýymdastyqtyń baspasóz qyzmeti habarlaǵandaı, QQQ-y jyljymaıtyn múlik naryǵyndaǵy qurylys materıaldaryn jetkizýshilermen jáne basqa da múddeli sýbektilermen aradaǵy qarym-qatynasyn qaıta qaraýǵa Úkimetten járdem suraýǵa nıettenip otyr. Aıta ketelik, birlestik músheleri Qazaqstandaǵy kommertsııalyq turǵyn úı qurylysynyń 60 paıyzyn, Astanadaǵy naryqtyń 80 paıyzyn ıelenedi. 2004 jyldyń mamyr aıynda qurylǵan qaýymdastyqqa 14 iri ınvestıtsııalyq-qurylys jáne holdıngtik kompanııalar kiredi. Olardyń qatarynda: «Bazıs-A korporatsııasy» JShS-i, «BI Group» holdıngi, «Shar qurylys» JShS-i, «Alıansstroıınvest» JShS-i, «Aqmola qurylys materıaldary» JShS-i, «Stroıkonstýktsııa» AQ-y, «Era» JShS-i, «Stroı-Kontrakt» korporatsııasy» JShS-i, «Qulager qurylys kompanııasy» JShS-i, «TS Development» JShS-i, «VEK» korporatsııasy» JShS-i, «Elıtstroı grýpp» JShS-i, «Orda Invest» korporatsııasy» JShS-i, «Aıbyn qurylys» JShS-i jáne t.b. bar.
Ámirlan Álimjan
