Qazaqstanda jańa bank qurylady
ASTANA. KAZINFORM — QR Qarjy naryǵyn retteý jáne damytý agenttigi Abu Dhabi Commercial Bank PJSC-ke Qazaqstan Respýblıkasynda enshiles bank qurýǵa ruqsat berdi.
Jańa sheteldik banktiń ashylýy Memleket basshysy Q.K. Toqaevtyń bank sektoryndaǵy básekelestikti arttyrý jónindegi tapsyrmasyna sáıkes keledi jáne Agenttik bank zańnamasyn yryqtandyrý jáne Qazaqstanǵa senimdi sheteldik bankterdi tartý úshin ashyq, aıqyn jáne básekelestik orta qurý boıynsha júrgizgen reformanyń nátıjesi sanalady.
— ADCB — Birikken Arab Ámirlikteriniń eń iri bankteriniń biri. Banktiń negizgi aktsıoneri — Abý-Dabı Úkimetine tolyǵymen tıesili Mubadala Investment Company PJSC ınvestıtsııalyq kompanııasy, bul ınstıtýtsıonaldyq qoldaý men senimdiliktiń joǵary deńgeıin qamtamasyz etedi. Bank joǵary halyqaralyq kredıttik reıtıngterge ıe (Fitch Ratings shkalasy boıynsha A+/F1/Stable). 2025 jylǵy 31 jeltoqsandaǵy jaǵdaı boıynsha ADCB jıyntyq aktıvteri 210 mlrd AQSh dollarynan astam, menshikti kapıtaly — 24 mlrd AQSh dollarynan astam, jyl qorytyndysy boıynsha taza paıda — 3 mlrd AQSh dollarynan astam qurady. Qarjylyq kórsetkishter banktiń joǵary qarjylyq ornyqtylyǵyn jáne enshiles bankke uzaq merzimdi qoldaý kórsetý qabiletin kórsetedi, — delingen agenttik habarlamasynda.
Enshiles bankke qatysty ADCB jalǵyz aktsıoner bolady. Bas bank Qazaqstan Respýblıkasy zańnamasynyń talaptaryna sáıkes jarǵylyq kapıtaldy qalyptastyrýdy, strategııalyq basqarýdy jáne qarjylyq jáne operatsııalyq qoldaýdy qamtamasyz etedi.
Jańa bank banktik qyzmetterdiń tolyq aýqymyn usynýdy, sondaı-aq «ıslam terezesi» tetigi arqyly ıslamdyq qarjylandyrýdy damytýdy josparlap otyr, bul ónim jelisin keńeıtedi jáne naryqta balamaly qarjy quraldarynyń qoljetimdiligin arttyrady. «Qazaqstan Respýblıkasyndaǵy bankter jáne bank qyzmeti týraly» jańa Zańnyń talaptaryna sáıkes ámbebap bank lıtsenzııasyn alý ishki ınfraqurylym qurylǵannan keıin jáne bank qyzmetin iske qosý boıynsha barlyq daıyndyq jumystary júrgizilgennen keıin kútiledi.
— Agenttik kelip túsken ótinish pen qujattar toptamasynyń negizinde Basqarmanyń 2026 jylǵy «20» naýryzdaǵy № 8 qaýlysymen ADCB-ǵa «Abu Dhabi Commercial Bank (Kazakhstan)» aktsıonerlik qoǵamynyń enshiles bankin ashý týraly ruqsat, sondaı-aq qurylatyn bankke qatysty bank holdıngi mártebesin alýǵa kelisim (2026 jylǵy «20» naýryzdaǵy № 9 qaýly) jáne enshiles uıymdy qurýǵa ruqsat (2026 jylǵy «20» naýryzdaǵy № 10 qaýly) berdi, — delingen habarlamada.
Jańa banktiń ashylýy Qazaqstan Respýblıkasynyń bank sektoryndaǵy básekelestikti damytýǵa, bıznes pen halyq úshin qarjylyq qyzmetter aıasyn keńeıtýge jáne halyqaralyq bank kapıtalyn tartýǵa yqpal etetin bolady.
Osyǵan deıin Prezıdent iri bankterdi talapty oryndamaı otyrǵany úshin synǵa alǵan edi.