Qazaqstanda jańa avtokólikter qymbattaýy múmkin
ASTANA. QazAqparat - Elde avtokólik baǵasy qymbattaýy múmkin. Sarapshylardyń aıtýynsha, avtosatýshylar baǵany qaıta qarap, jańa valıýta baǵamyna baılanystyrady dep otyr, dep habarlaıdy «Astana» telearnasy.
AQSh aqshasy qymbattaǵaly avtosalondarda baǵa ózgergen joq. Sheteldik kólikterdiń quny ázirge óse qoımaǵan. Biraq sý jańa temir tulparlardyń jańa partııasyna jańa baǵa qoıylýy múmkin.
«Qazir turǵan avtokólikterge tapsyrysty biz qańtar aıynda bersek, ol kezde dollardyń baǵasy 320 teńge bolatyn. Qazirgi ýaqytta 360 teńge. Sondyqtan kelesi jyldyń basynda keletin avtokólikter qymbat bolatyn shyǵar», - deıdi «MERCUR AUTO» kompanııasy satý bóliminiń menedjeri Nurjan Maǵzumov.
Avtomobıl satýshylar kólikti dollarmen ǵana emes, rýblmen de satyp alady. Rýblge qatysty teńge baǵamy turaqty. Sondyqtan reseılik kólikter quny saqtalýy yqtımal. Biraq baǵam aýytqyǵaly avtosalondarda satyp alýshylar qarasy kóbeıip, ne azaımaǵan. Biraq mamandar kólikti qazir alǵan durys dep otyr.
«Shetelden kelgen komponentter burynǵy baǵamen kirgizildi de, kólikter burynǵy baǵamen satylyp otyr. Keıin dollardyń qymbattaýyna baılanysty kólikter de qymbattaýy kerek. Jarty jyl ýaqyt aralyǵynda qymbattaýy múmkin. Sondyqtan kólik alýdy josparlap otyrǵan adamdar qazir alyp alǵany jón dep oılaımyn», - deıdi «Qazaqstan avtobıznes qaýymdastyǵynyń» tehnıkalyq retteý dırektory Erbol Seıpilov.
Degenmen, mamandar otandyq kólikter baǵasy saqtalady dep otyr. Bıyl óndiris 86 paıyzǵa artqan. Bıyl 17 myń júırik tulpar qurastyrylǵan. Olardyń jalpy quny shamamen 104 mlrd teńgeni quraıdy.
Al "Qazavtoónerkásip" dırektorlar keńesiniń tóraǵasy Oleg Alferov: «Ázirge aıtarlyqtaı alańdaýshylyqqa esh negiz joq jáne dabyl qaǵý erte. Búgingi tańda qazaqstandyq naryqtaǵy qoljetimdi 10 kóliktiń beseýi otandyq bolyp tabylady» degen pikir bildirgen.
Bul pikirge qaramastan avtobloger Dıas Ýálıhanov baǵa bir aıdan soń-aq qubylady dep boljaıdy. Sondyqtan kólikke suranys tómendeıtinine senimdi. «Barlyǵy jańa baǵammen sata bastaıdy. Sondyqtan baǵa kóteriledi. Bul, menińshe, turaqty bolyp kelgen satylymǵa áser etedi. Jyl basynan beri saýda jaqsy boldy, biraq endi tómendeıdi. Az satyla bastaıdy», - deıdi ol.
