Qazaqstanda jańa áýejaılar salynady - Jeńis Qasymbek
ASTANA. QazAqparat - Búginde shaǵyn avıatsııa salasynda áýe reısterin oryndaıtyn kompanııa da anyqtaldy, dep xabarlaıdy QazAqparat tilshisi.
QR Investıtsııalar jáne damý mınıstri Jeńis Qasymbektiń aıtýynsha, oblystar arasyndaǵy jolaýshylar tasymalyn arttyrý maqsatynda kishi avıatsııany jan-jaqty damytý josparlanǵan. Ol úshin ondaǵan shaǵyn áýejaılar salynady. "5 áýejaıda joldyń ústi qatty bolady. Al 11 áýejaıda grýnt tóseledi. Atalǵan jobalarǵa respýblıkalyq jáne jergilikti bıýjetterden qarjy bólinedi. Árıne, ishki reısterge ushaqtar qajet bolady. Sol sebepti Almaty oblystyq ákimdigimen birlese otyryp, "Jetisý" áýe kompanııasy negizinde osy jumysty bastap kettik. Lızıng arqyly 20-ǵa jýyq ushaqty satyp alynady", - dedi J.Qasymbek Úkimettiń búgingi otyrysynda.
Mınıstrdiń sózine qaraǵanda, sońǵy 25 jyldyń ishinde úlken avıatsııany damytý jumysyna basa nazar aýdaryldy. Endigi kezekte kishi avıatsııany kúsheıtý kerek. "Máselen, ótken jyly Úrjar, Úsharal sııaqty shaǵyn áýejaılar ashylǵan bolatyn. Endi, avıatsııanyń osy túrin qoldaý úshin biz arnaıy sýbsıdııalardy berip otyrmyz. Byltyr Astana men Almatydan Úrjarǵa sýbsıdııa berildi. Osy joly Astana men Almatydan Úsharalǵa ushý boıynsha sýbsıdııany bereıin dep jatyrmyz", - dep atap kórsetti J.Qasymbek.
Aıta keteıik, búgingi otyrysta Jeńis Maxmuduly taǵy bir ulttyq kompanııanyń qurylatynyn jarııalady. Budan bólek, Aqtóbede oblysyndaǵy qaıǵyly oqıǵadan keıin avtobýstarǵa qatysty talaptar kúsheıtiledi.
