Qazaqstanda jańa áleýmettik kómek túri engiziledi
ASTANA. QazAqparat - «Órleý» jobasy aıasynda Qazaqstanda otbasyna qoldaý kórsetý ınstıtýty engiziledi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
2018 jyldyń 1 qańtarynan bastap Qazaqstannyń barlyq óńirinde shartsyz jáne shartty aqshalaı kómek syndy jańa úlgidegi ataýly áleýmettik kómek engiziledi.
Shartsyz aqshalaı kómek quramynda eńbekke jaramsyz músheleri bar otbasylarǵa (qart zeınetkerler men múgedekter otbasy) nemese eńbekke jaramdy otbasy músheleri belgili bir sebeptermen jumyspen qamtý sharalaryna qatysa almaıtyn otbasylarǵa (mysaly, mektep jasyndaǵy balalary bar jalǵyzbasty ana) beriledi. Mundaı otbasylardan járdemaqy alýy úshin jumyspen qamtý sharalaryna mindetti qatysý talap etilmeıdi.
Shartty aqshalaı kómek qıyn jaǵdaıda qalǵan otbasynyń eńbekke jaramdy múshelerine áleýmettik kelisimshartqa otyrý arqyly qosymsha kómek usynady. Shartty kómek bolashaqta eńbekpen qamtý arqyly turaqty kiris kózin qamtamasyz etý, keıinirek jumysqa ornalasý maqsatynda beriledi. Jobaǵa qatysý kezinde qatysýshyǵa qosymsha derbes aqshalaı kómek beriledi.
Áleýmettik kelisimshartqa qatysýshy taraptardyń ózara mindetteri belgilenedi. Máselen, ókiletti organ qıyn jaǵdaıǵa tap bolǵan naqty bir otbasyǵa derbes jospar ázirlep, áleýmettik kómek alýshylardyń ómir súrý deńgeıine monıtorıng júrgizedi. Osylaısha, kelisimshartta ókiletti organ men otbasy júzege asyratyn sharalar kesheni kózdeletindikten, Qazaqstanda otbasyna qoldaý kórsetý ınstıtýty iske qosylady.
2017 jyldyń alǵashqy toqsanynda "Órleý" jobasyna 48,3 myń adam nemese 8,2 myń otbasy qatysty. Bul ýaqyt aralyǵynda olarǵa respýblıkalyq jáne jergilikti bıýdjet esebinen 1,7 mlrd teńge somasynda shartty aqshalaı kómek kórsetildi. Jobaǵa qatysýshy otbasylardyń 87% eńbekke jaramdy músheleri turaqty jumys oryndary arqyly eńbekpen qamtyldy.
