Qazaqstanda jańa aqparattyq portal iske qosyldy

NUR-SULTAN. QazAqparat – Qazaqstanda halyq-uni.kz ataýymen jańa aqparattyq portal iske qosyldy. Qazaq tilindegi jańa medıa oqyrmanǵa elimizdegi ekonomıkalyq, áleýmettik, saıası jáne mádenı taqyryptarda mańyzdy aqparattar men saraptamalyq-taldaý materıaldar usynyp otyrmaq, dep habarlaıdy QazAqparat.

Halyq-uni.kz jobasynyń eldiń barlyq óńirinde arnaıy tilshileri bar.

Jańa ınternet-resýrstyń bas redaktory Jandos Baıdildanyń aıtýynsha, «Halyq Uni» halyqtyń suranysyna saı aqparat beretin elimizdegi irgeli portaldardyń biri bolmaq.

«Qazir qazaq tilinde aqparattyq saıttar kóp, alaıda olardyń ishinde sapaly kontent usynatyndary az. Oqyrmannyń sapaly ári tereń tanymdyq dúnıeler oqýǵa haqysy bar. Sondyqtan, eldiń sózin sóılep, áleýmettiń máselesin kótersek degen nıetpen «Halyq Uni» jobasyn qolǵa aldyq. Portaldyń aty aıtyp turǵandaı, medıa naryǵyna engen jańa jobamyz halyqtyń sózin sóılep, olardyń qordalanǵan máselesin bılikke jetkizýdi, jetkizip qana qoımaı, onyń oryndalýyna yqpal etýdi kózdeıdi.

Óńirlerdegi tilshilerimiz óz aımaǵynda bolyp jatqan kez kelgen aqparatty búkpesiz, shynaıy, naqty dáleldermen usynady.

Elimizdiń kez kelgen azamaty redaktsııamyzǵa tikeleı habarlasyp, ózin tolǵandyrǵan másele boıynsha júgine alady. Biz kóp saıttyń biri emes, senimdi aqparat kózi bolýdy maqsat tutyp otyrmyz», – deıdi Jandos Baıdilda.

Internet-jobada suhbattar, mýltımedıalyq tehnologııalardy paıdalana otyryp eksklıýzıvti materıaldar jarııalanady. Saıtta jarııalanǵan materıaldardy súıemeldep, ony oqyrmanǵa usyný úshin aqparattyq portaldyń birqatar áleýmettik jelide resmı paraqshalary jumys isteıdi.