Qazaqstanda jańa 60-qa jýyq mamandyq paıda boldy
«Kadr daıarlaý boıynsha eń basty másele – berilgen bilimniń naryq talabyna sáıkes bolýy. Onyń basty sharty – akademııalyq derbestik. Munyń aldynda qandaı pánniń neshe saǵat oqytylatyny jáne olardyń mazmuny mınıstrlik arqyly, ıaǵnı memleket arqyly retteletin. Al naryq talaptary tez ózgerip otyrady, sondyqtan júıe eskirip, bilim berý baǵdarlamalary sáıkes kelmeıtin, jańa mamandyq ashý úshin 1-2 jyl ketetin boldy. Endi ýnıversıtetterge akademııalyq derbestik berilip, olar bilim berý baǵdarlamalaryn kásibı standarttarǵa sáıkes ázirleıdi. ıAǵnı, endi memleket emes, oqý orny jumys berýshilermen birlese otyryp, oqý baǵdarlamalaryn retteýge múmkindik aldy», - dedi Bilim mınıstri Úkimettiń búgingi otyrysynda.
Onyń aıtýynsha, endigi problema – naryqqa qandaı daǵdylar qajettigin anyqtaıtyn kásibı standarttardyń jetispeıtininde. Kolledjderge de akademııalyq derbestik berilip jatyr. Buǵan deıin stýdentter 2-4 jylǵa deıin uzaq oqıtyn, jumys berýshiniń talaptary eskerilmedi, mektepte oqyǵan pánder qaıtalanyp, bir ǵana biliktilik alyp shyǵatyn. Endi kolledjderge kásiptik standarttar negizinde oqytý baǵdarlamasyn derbes ázirlep, oqý merzimderin ózderi aıqyndaı alady jáne túlek úsh biliktilikke deıin alyp shyǵady.
«Eskirgen mamandyqtar joıylyp, jańa mamandyqtar ashylyp jatyr. Mysaly 50-ge jýyq eski mamandyq boıynsha biz oqytýdy toqtattyq jáne tıisinshe 60-qa jýyq buryn-sońdy oqytylmaǵan mamandyqtar ashylǵan. Sapany qamtamasyz etýdiń taǵy bir sharty – bilim berý baǵdarlamalaryn jańartý. Daıyn bolǵan kásibı standarttar boıynsha ýnıversıtetterde 4 myńnan astam baǵdarlama jańartyldy. Buryn bolmaǵan jasandy ıntellekt, IT-medıtsına, tsıfrlyq zańger sııaqty 269 jańa baǵdarlama engizildi. Bular «Jańa bolashaq mamandyqtar atlasyna» sáıkes ashylyp otyr», - dedi Ashat Aımaǵambetov.
Aıta keteıik, kelesi oqý jyly úshin joǵary oqý oryndaryna 73 myń, kolledjderge 31 myń grant bólinedi.
