Qazaqstanda jalpyǵa birdeı deklaratsııa tapsyrý kezeń-kezeńmen engiziledi

NUR-SULTAN. QazAqparat – Elimizde jalpyǵa birdeı deklaratsııa tapsyrý kezeń-kezeńmen engiziledi, dep habarlaıdy QazAqparat Memlekettik kirister komıtetine silteme jasap.

Vedomstvonyń baspasóz qyzmetiniń málimetinshe, bıyl 3 shildede jalpyǵa birdeı deklaratsııalaýdy engizýdi 2020 jylǵy 1 qańtardan 2021 jylǵy 1 qańtarǵa aýystyrýdy jáne budan ári kezeń-kezeńimen kóshýdi kózdeıtin «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý jáne mıkroqarjylyq qyzmet máseleleri boıynsha ózgerister men tolyqtyrýlar engizý týraly» (№262-VI QRZ) Qazaqstan Respýblıkasynyń Zańy qabyldandy.
«Birinshi kezeńde – 2021 jylǵy 1 qańtardan bastap jalpyǵa birdeı deklaratsıalaý sheńberindegi deklaratsııany: jaýapty memlekettik laýazymdaǵy adamdar men olardyń jubaıy (zaıyby);
memlekettik fýnktsııalardy oryndaýǵa ýákilettik berilgen adamdar men olardyń jubaıy (zaıyby); memlekettik fýnktsııalardy oryndaýǵa ýákilettik berilgen adamdarǵa teńestirilgen adamdar men olardyń jubaıy (zaıyby);
«Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq Zańyna jáne «Sybaılas jemqorlyqqa qarsy is-qımyl týraly», «Qazaqstan Respýblıkasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar rynogy týraly» Qazaqstan Respýblıkasynyń zańdaryna sáıkes deklaratsııa usyný jónindegi mindet júktelgen adamdar bolyp tabylatyn jeke tulǵalar tapsyrady», delingen habarlamada.
Ekinshi kezeńde – 2023 jylǵy 1 qańtardan bastap memlekettik mekemelerdiń jumyskerleri men olardyń jubaıy (zaıyby), sondaı-aq kvazımemlekettik sektor sýbektileriniń jumyskerleri men olardyń jubaıy bolyp tabylatyn jeke tulǵalar tapsyrady.
«Úshinshi kezeńde – 2024 jylǵy 1 qańtardan bastap zańdy tulǵalardyń basshylary men quryltaıshylary jáne olardyń jubaıy, dara kásipkerler jáne olardyń jubaıy tapsyrady.
Tórtinshi kezeńde – 2025 jylǵy 1 qańtardan bastap azamattardyń qalǵan sanattary deklaratsııa tapsyrady», delingen habarlamada.