Qazaqstanda jalpy óndiristik jaraqat alý sońǵy 5 jylda 23,3%-ǵa tómendedi - QR DSÁDM

ASTANA. QazAqparat - Qazaqstanda jalpy óndiristik jaraqat alý sońǵy 5 jylda 23,3%-ǵa tómendedi, dep habarlaıdy www.pm.kz QR Densaýlyq saqtaý jáne áleýmettik damý mınıstrligine silteme jasap.

2016 jylǵy 1 shildedegi málimetter boıynsha respýblıkadaǵy kásiporyndar men uıymdarda qaıǵyly oqıǵalar saldarynan 792 adam zardap shekti. Bul ótken jyldyń sáıkes kezeńimen salystyrǵanda 5,6%-ǵa tómen boldy (2015 jyly - 839 adam).

2011 jyldan bastap memlekettik organdar men jumys berýshilerdiń Qazaqstandaǵy eńbek qaýipsizdigi men ony qorǵaý salasyndaǵy qabyldaǵan keshendi sharalary nátıjesinde óndiristegi qaıǵyly oqıǵalar kórsetkishiniń tómendeýi baıqalyp otyr. Atalǵan ýaqyt aralyǵynda jalpy óndiristik jaraqat alý kórsetkishi 23,3%-ǵa tómendep, 2015 jyly 1 723 adam boldy (2011 jyly 2 217 adam).