Qazaqstanda jalǵyz zańdy tólem quraly bar - Ulttyq bank
ASTANA. QazAqparat - Qazaqstannyń aýmaǵynda teńge jalǵyz tólem quraly bolyp tabylady. Osyǵan oraı krıptovalıýtalar el aýmaǵynda tólem quraly retinde paıdalanylmaıdy. Bul týraly QazAqparat Banktiń baspasóz qyzmetine silteme jasap habarlaıdy.
«Qarjy uıymdaryna sondaı-aq zańnamada tikeleı kózdelmegen operatsııalardy júrgizýge tyıym salynady. Osylaısha, tikeleı retteýge qaramastan, búgingi kúni qarjy sektorynda menshikti nemese klıenttik operatsııalar boıynsha, sondaı-aq esep aıyrysý birligi retinde krıptovalıýtalardy paıdalaný zańnamaǵa qaıshy keledi», - dep túsinikteme berdi Ulttyq banktiń tólem júıeleri departamenti basqarmasynyń bastyǵy Alına Imanǵazına.
A. Imanǵazına halyqtyń krıptovalıýtalarǵa degen suranysy tez ári joǵary kiris alý maqsatynda ınvestıtsııalarǵa arnalǵan nysana retinde baıqalatynyn atap ótti. Ol bul rette krıptovalıýtalardyń eshqandaı qundylyǵy, quny joq ekendigin túsiný qajet jetkizdi. Baǵa alypsatarlyq kútýlermen órshı túsetin suranyspen ǵana qamtamasyz etiledi. Tek sońǵy eki aıda eń belgili krıptovalıýta - bıtkoınniń baǵasy 2,5 ese quldyrady. Bul naryqtaǵy keıingi is-qımyldy boljaý múmkin emes. Bul halyq salǵan qarajatty joǵaltýdyń joǵary táýekelderine aparady.
«Budan basqa, krıptovalıýtalardyń tanymaldyǵy aıasynda qarjylyq pıramıdalar belgileri bar túrli alaıaqtyq shemalary týyndaıdy. Sonymen birge krıptovalıýtalar arqyly jańa jobalarǵa qarajat tartý (ICO) belsendi túrde jarnamalanýda. ICO ınvestıtsııalaý qaǵıdattary IPO-ǵa uqsas ekendigine qaramastan, bul jaǵdaıda eshkim emıtentterdi teksermeıdi jáne ınvestorlardyń quqyqtaryn qorǵaýǵa kepildik bermeıdi. Krıptovalıýtalarmen barlyq operatsııalardy halyq pen zańdy tulǵalar táýekelge bel býyp jasaıdy», - dedi bank ókili.
Krıptovalıýtalarmen jasalatyn operatsııalarmen qatar júretin teris saldardy azaıtý úshin Ulttyq Banktiń sarapshylary krıptovalıýtalyq qarjylyq pıramıdalardyń paıda bolýyn boldyrmaý, halyqtyń tsıfrlyq jáne qarjylyq saýattylyǵyn arttyrý, osy saladaǵy zańnamany qatańdatý jónindegi jumystardy kúsheıtý qajet dep sanaıdy.
