Qazaqstanda jalǵan shaǵym túsirgenderge jaza kúsheıtildi
NUR-SULTAN. QazAqparat – Qazaqstanda jalǵan shaǵym úshin jaýapkershilik kúsheıtildi. Bul týraly QR ІІM Tergeý departamentiniń basshysy Sanjar Ádilov aıtyp berdi, dep habarlaıdy QazAqparat tilshisi.
Jeltoqsan aıynda Prezıdent Qasym-Jomart Toqaev «Qazaqstan Respýblıkasynyń keıbir zańnamalyq aktilerine qylmystyq, qylmystyq-protsestik zańnamalardy jetildirý jáne jeke adamnyń quqyqtaryn qorǵaýdy kúsheıtý máseleleri boıynsha ózgerister men tolyqtyrýlar engizý týraly» Zańǵa qol qoıdy. Osy zań arqyly QR Qylmystyq kodeksiniń 10 taraýyndaǵy 69 bapqa jáne Qylmystyq-protsestik kodekstiń 72 babyna túzetýler engiziledi.
«Óz maqsattaryna qol jetkizý maqsatynda keı adamdardyń qatań jazalarǵa negizdelgen amal-aılalardy jasamaýy úshin Qylmystyq kodekstiń 419-baby - jalǵan shaǵym úshin jaýapkershilik kúsheıtildi», - dedi S. Ádilov Ortalyq kommýnıkatsııalar ortalyǵynda ótken brıfıngte.
Buǵan deıin adamdy aýyr nemese asa aýyr qylmys jasady dep jalǵan aıyptaǵany úshin 3 jyldan 7 jylǵa deıin bas bostandyǵynan aıyrý qarastyrylsa, endi bul jaza 3 jyldan 8 jylǵa deıingi merzimge uzartyldy.
«Qylmystyq toptyń múddesi úshin jasalǵan dál osyndaı áreketter jańa zańǵa sáıkes, 5 jyldan 12 jylǵa deıin bas bostandyǵynan aıyrýdy kózdeıdi, buryn 5-10 jylǵa deıin bas bostandyǵynan aıyrý bolatyn», - dedi ol.
Aıta keteıik, atalǵan zań 11 qańtar kúni kúshine enedi.
