Qazaqstanda jalǵa berý jáne basqarý qyzmetterine suranys artty

ASTANA. KAZINFORM — 2025 jylǵy qańtar–maýsym aılarynda jyljymaıtyn múlik operatsııalary boıynsha kórsetilgen qyzmetterdiń kólemi 1,4 trıllıon teńgege jetti, dep habarlaıdy Ulttyq statıstıka bıýrosy.

Bıýro málimetinshe, bul ótken jyldyń osy kezeńimen salystyrǵanda 35,2 paıyzǵa kóp.

— Kórsetilgen qyzmetterdiń eń úlken úlesi turǵyn úıdi jalǵa berý jáne basqarýǵa (sýbarenda) tıesili boldy — 681,5 mıllıard teńge. Bıznes-ortalyqtardy, keńse ǵımarattaryn jáne ákimshilik nysandardy jalǵa berý men basqarýdan túsken tabys — 180,9 mıllıard teńge. Saýda salasyndaǵy kópfýnktsııaly keshender men kommertsııalyq nysandardy jalǵa berý jáne basqarý — 136,7 mıllıard teńgeni, basqa sanattarǵa kiretin jyljymaıtyn múlikti jalǵa berý men basqarý — 106,2 mıllıard teńgeni qurady, — delingen taratylǵan aqparatta.

Kóppáterli jáne jeke turǵyn úılerdi satý-satyp alý operatsııalarynyń kólemi — 75 mıllıard teńge,
al basqa jyljymaıtyn múlikti satyp alý-satý kólemi — 4 mıllıard teńge boldy.

Eń tómen kórsetkish kórme jáne konferentsııa zaldaryn jalǵa berý men basqarý salasynda tirkeldi — bar bolǵany 554,8 mıllıon teńge.

Óńirler boıynsha eń kóp qyzmet kólemi Almaty qalasynda tirkeldi — 608,8 mıllıard teńge. Odan keıin Astana qalasy — 257,1 mıllıard teńge jáne Shyǵys Qazaqstan oblysy — 97,4 mıllıard teńge kólemimen kósh bastap tur.

Osydan buryn Ulttyq statıstıka bıýrosy Qazaqstanda astyq jınaıtyn kombaındar óndirisi artqanyn habarlady.