Qazaqstanda jalǵa beriletin úı jarty jylda 20-30 paıyzǵa arzandady
ALMATY. QazAqparat - Qazaqstanda qozǵalmaıtyn múliktiń arendalyq stavkasy jarty jyl ishinde 20-30 paıyzǵa tómendedi. Bul týraly «QazAqparat» tilshisine Birikken rıeltorlar qaýymdastyǵynyń prezıdenti Elena Grıva habarlady.
«Naryqta jalǵa berýshiler jáne úıin satýdan góri arendaǵa usynatyndar qatary artyp otyrǵandyqtan jarty jyl ishinde atalǵan baǵyttaǵy stavkalar 20-30 paıyzǵa azaıdy. Jalǵa berýshiler jalǵa alýshy uzaq merzimge kelisim jasasqan jaǵdaıda da baǵany tómendetedi», - dedi Elena Grıva.
Onyń aıtýynsha, jazdyń úsh aıynda turǵyn úı baǵasy ózgergen joq. Almatyda qyrkúıek aıynda tamyz aıymen ortasha baǵa 1,7 paıyzǵa ósti. Al Astanada 0,8 paıyzǵa kóterilgen.
