Qazaqstanda jalǵa beriletin baspana baǵytynda Turǵyn úı qurylys korporatsııasy quryldy
ASTANA. 25 aqpan. QazAqparat - Qazaqstanda jalǵa beriletin baspana qurylysyn damytý úshin Turǵyn úı qurylys korporatsııasy quryldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Óńirlik damý mınıstrliginiń turǵyn úı saıasaty departamentiniń dırektory Kenjebolat Myńbaev habarlady.
«Jalǵa beriletin turǵyn úı qurylysyn damytý aıasynda Qazaqstandyq ıpotekalyq kompanııasynyń jelisi boıynsha jylyna 530 myń sharshy metrge deıin salý josparlanyp otyr. Osy tetikti júzege asyrý úshin turǵyn úı qurylysy korporatsııasyn qurý qarastyryldy. Ol óz kezeginde úzdik qurylys kompanııalarymen jáne qurylys ındýstrııasynyń kásiporyndarymen yntymaqtasyp, jumys isteıtin bolady»,-dedi K. Myńbaev.
