Qazaqstanda jalaqynyń naqty quny tómendedi
ASTANA. QazAqparat - Qazaqstandyqtardyń naqty jalaqylary tómendeýde. Aǵymdaǵy jyldyń ekinshi jartyjyldyǵynda jaldamaly jumysshylardyń jalaqylarynyń satyp alý qabileti ótken jylǵy deńgeıimen salystyrǵanda 2,9 paıyzǵa qysqardy. Bul týraly Ranking.kz saıty habarlady.
Esterińizge sala ketsek, aǵymdaǵy jyldyń qańtar-naýryz aılarynda Qazaqstandaǵy jalaqy qunynyń jyldyq quldyraýy 2 paıyzdy quraǵan bolatyn. Bul rette Qazaqstan turǵyndarynyń ortasha aılyq ataýly jalaqylary 4,4 paıyzǵa ósti. Biraq negizgi tutyný taýlarlary men qyzmetter baǵasynyń ósimi joǵary boldy. Sonyń saldarynan eldegi eńbek tabysynyń naqty quny tómen bolyp otyr. Jaldamaly jumystyń ulttyq naryǵy kólemi jaǵynan qaıta qalpyna kelýge tyrysýda. Alaıda ósim barynsha álsiz júrýde. Aǵymdaǵy jyldyń qańtar-maýsymynda Qazaqstandaǵy jaldamaly jumysshylardyń naqty sany 3,5 mln adamdy qurady. Bul bir jyl burynǵy san deńgeıinen 1,5 paıyzǵa joǵary.
Aıta keterligi, ótken jyly eńbek naryǵynyń kólemi kúrt qysqaryp, ortasha jyldyq deńgeıdegi kórsetkishtiń kemýi 5,4 paıyz boldy. Sońǵy 5 jyldyń ishinde respýblıkadaǵy jaldamaly jumysshylardyń eń kóp sany 2015 jyly 3,6 mln adam bolyp tirkeldi.
2017 jyldyń 2 toqsanynda Qazaqstannyń ne bári 2 óńirinde ǵana naqty jalaqy ósimi tirkeldi. Olar: Aqtóbe (1,3 paıyz) jáne Mańǵystaý (0,8) oblystary. Sáýir-maýsymda jalaqynyń satyp alý qabiletiniń barynsha qysqarýyn Atyraý turǵyndary sezindi. Bul óńirde naqty jalaqy 2016 jyldyń 2 toqsanymen salystyrǵanda birden 13,3 paıyzdy qulady. Astanada jumysshylardyń jalaqysy 0,1 paıyzǵa kemidi. Al Almatyda naqty jalaqynyń quldyraýy jyldyq mánde 5,2 paıyzdy qurady.
Aǵymdaǵy jyly Qazaqstanda nátıjeli jumyspen qamtý jáne jappaı kásipkerlikti damytý baǵdarlamasy bastalady. Baǵdarlama 2021 jylǵa deıin jumys isteıdi. Ol júzege asyrylǵannan keıin Qazaqstandaǵy jumyssyzdyq deńgeıi 4,8 paıyzǵa qysqarady dep kútilýde.
