Qazaqstanda jalaqy tóleýdiń jańa júıesi engiziledi - Qojamjarov
ASTANA. QazAqparat - 9 qarashada Memlekettik qyzmet isteri jáne sybaılas jemqorlyqqa qarsy is-qımyl agenttiginde Qoǵamdyq keńestiń otyrysy ótti, dep habarlaıdy agenttiktiń baspasóz qyzmeti.
Іs-shara qatysýshylardyń pikir almasýy jáne áńgimelesý formatynda uıymdastyryldy.
Agenttik tóraǵasy Qaırat Qojamjarov 100 naqty qadam - Ult josparynyń birinshi ınstıtýtsıonaldyq reformasy «Kásibı memlekettik apparatty qurý» boıynsha júzege asyrylyp jatqan jumystyń barysy, halyqqa kórsetiletin qyzmetterdiń sapasyn baqylaý jáne sybaılas jemqorlyqqa qarsy is-qımyl jumysy boıynsha, aldaǵy kezeńdegi mindetter týraly baıandady.
Vedomstvo basshysy aldaǵy negizgi mindet eńbekaqynyń jańa júıesin engizý máselesi bolyp tabylatynyn jáne ol onyń jeke sektormen salystyrǵanda básekege qabilettiligin qamtamasyz etip, ortalyq pen óńirlerdegi qyzmetkerlerge tóleýdiń úılespeýshiligin joıatynyn atap ótti.
Jalaqy tóleýdiń jańa júıesi eki bólikten turady. Birinshisi - tııanaqtalǵan, ol - faktorlyq-baldyq mejege negizdelgen. Bul ádistemede jalaqynyń mólsheri jumystyń kúrdeliligi men kólemine, sıpatyna baılanysty bolady. Eńbekaqynyń ekinshi bóligi - bonýstar. Ol jylsaıyn tıimdi qyzmetkerlerge olardyń qyzmetterin baǵalaýdyń qorytyndysy boıynsha tólenedi.
Kelesi jyly Elbasynyń tapsyrmasy boıynsha bul júıeniń aprobatsııasy Agenttik pen Astana qalasy ákimdiginiń negizinde júrgiziledi. Keleshekte sátti pılottyq aprobatsııa basqa da memlekettik organdarǵa taratylady.
Bıylǵy jyl memlekettik apparatty kásibılendirý maqsatyna jetý boıynsha sózsiz nátıjeli bolyp tabylady.
Sonymen qatar, is-shara barysynda Agenttik basshysy Qoǵamdyq keńes múshelerine qyzmetkerlerdi áleýmettik qamsyzdandyrý, merıtokratııa qaǵıdattaryn kúsheıtý jáne irikteý tártibiniń ashyqtyǵy, almasýshylyq pen aýyldardaǵy kadrlardyń tapshylyǵy, memlekettik apparatty ońtaılandyrý jáne óńirlerde shtat sanynyń árkelki bólinisi, kadrlardyń rotatsııasy suraqtary boıynsha qabyldanyp jatqan sharalar týraly baıandady.
Agenttikpen memlekettik qyzmetkerlerdi zeınetaqy jáne turǵyn úımen qamsyzdandyrý, tegin medıtsınalyq qyzmet alý máseleleri sekildi áleýmettik qorǵaýdy arttyrý sharalaryn qoldaný josparlanýda.
Memlekettik qyzmetke qabyldaý tártibin jetildirý sheńberinde, olardyń ashyqtyǵyn qamtamasyz etetin irikteý mehanızmderi engizildi.
Jyl basynan beri 5,5 myń adam memlekettik qyzmettiń bastapqy deńgeıine jumysqa turdy, bul 2015 jylǵa qaraǵanda úsh ese kóp.
Aýysý deńgeıi 2 esege tómendedi (11,2% -dan 6,3% -ǵa deıin), bul bilikti kadrlardyń ketýin azaıtty.
2015 jyldyń osy kezeńimen salystyrǵanda konkýrstan tys aýysý dengeıi 21 astam ese qysqartyldy (4927-den 228-ge deıin) .
Básekelestik negizinde qadamdyq mansaptyq ósý qaǵıdasyn engizý nátıjesinde, joǵary turǵan bos oryndardyń 90% -nan astamyn aǵymdaǵy qyzmetkerler ıelendi.
Aýyldyq jerlerde memlekettik qyzmettiń tartymdylyǵyn arttyrý úshin aýyldyq deńgeıdegi qyzmetkerlerge qosymsha áleýmettik jáne quqyqtyq kepildikter engizý boıynsha keshendi jumys júrgizilýde.
Memlekettik qyzmetkerlerge «Dıplommen aýylǵa» jobasy aıasynda qarastyrylǵan kepildikter berý máselesin Memleket basshysy qoldady. Tıisti normatıvtik qujattar daıyndaldy.
Agenttik óńirlerdegi shtat sanynyń lımıtin qaıta qaraýdy, sonymen qatar, aýyldyq ákimdikter apparatyn nyǵaıtýdy usynady.
Sondaı-aq, Qoǵamdyq keńes múshelerin memlekettik qyzmetshilerdiń keshendi attestatsııalaý qorytyndylary qyzyqtyrdy.
Agenttik tóraǵasy attestattaý qorytyndysy boıynsha aımaqtyq basqarmalar basshylarynyń baǵdarlamalyq qujattarǵa qatysty bilimderiniń tómendigi anyqtalǵandyǵyn atap ótti.
Sondyqtan, zańnama boıynsha testileý baǵdarlamasyna elimizdiń strategııalyq qujattaryna qatysty suraqtar engiziledi.
Kezdesý sońynda, S.Qanaev tóraǵalyq etetin Qoǵamdyq keńestiń músheleri Agenttiktiń ótken kezeńdegi qyzmetine oń baǵa berdi.
Otyrysqa qatysýshylar, Agenttiktiń jumysyna qatysty mańyzdy sheshimder qabyldaý kezinde qoǵamnyń pikiri eskeriletindigin atap ketti.
Sonymen qatar, Qoǵamdyq keńes músheleri Agenttiktiń baǵyt baǵdarlary boıynsha qabyldanatyn sharalary oń nıetti jáne negizdelgen bolyp tabylatyndyǵyn, sondaı-aq, 100 naqty qadam - Ult josparynda aıqyndalǵan Elbasy úmitin aqtaý úshin baǵyttalǵandyǵyn atap ótti.
Qoǵamdyq keńestiń qurylǵan kúninen bastap, Qoǵamdyq keńespen memlekettik qyzmet, memlekettik kórsetiletin qyzmet jáne sybaılas jemqorlyqqa qarsy is-qımyl salalaryn retteıtin mańyzdy 22 normatıvtik quqyqtyq aktiler jobasy kelisildi.
