Qazaqstanda jalaqy bereshegi boıynsha 642 mln teńge anyqtaldy
ASTANA. KAZINFORM — Bıylǵy jylǵy 1 sáýirdegi jaǵdaı boıynsha memlekettik eńbek ınspektorlary respýblıkadaǵy 140 kásiporynda 1,1 myńnan astam jumysker aldynda 642 mln teńgeden asatyn jalaqy bereshegin anyqtady. Bul týraly Eńbek jáne halyqty áleýmettik qorǵaý mınıstrligi málim etti.
Sonymen qatar júrgizilgen tekserýler barysynda túrli uıymdarda eńbek quqyqtarynyń 2 myńnan astam buzýshylyǵy tirkeldi.
— Jalaqy boıynsha bereshek pen eńbek quqyqtarynyń buzýshylyqtary anyqtalǵan kásiporyn basshylaryna oryndaýǵa mindetti 1 110 nusqama berilip, jalpy somasy 136,5 mln teńgeden asatyn aıyppul salyndy, — delingen habarlamada.
Qabyldanǵan sharalardyń, onyń ishinde jalaqy bereshegin óteýdiń naqty merzimderi men qatań kestesin belgileýdiń nátıjesinde 7 myń jumyskerdiń quqyǵy qorǵalyp, olarǵa 463,3 mln teńge tólendi.
Sonymen qatar QR Eńbek jáne halyqty áleýmettik qorǵaý mınıstrligi eńbek zańnamasynyń saqtalýyna memlekettik baqylaýdy qamtamasyz etý máselelerin erekshe baqylaýda ustap otyr.
2026 jylǵy 1 sáýirdegi derekterge sáıkes memlekettik eńbek ınspektorlary 1 723 tekserý júrgizip, onyń barysynda 2 065 quqyqbuzýshylyq anyqtady.
Onyń ishinde: eńbek qatynastary salasynda — 1 735, eńbek qaýipsizdigi jáne eńbekti qorǵaý boıynsha — 305, halyqty jumyspen qamtý máseleleri boıynsha — 25.
Qabyldanǵan sharalardyń nátıjesinde 17,5 myń jumyskerdiń eńbek quqyǵy qorǵaldy.
Al Qazaqstanda byltyr óndiristik jazataıym oqıǵalar sany 1380-ge jetken.
