Qazaqstanda jaqyn besjyldyqta kadr tapshylyǵy boljanady - T. Dúısenova
ASTANA. QazAqparat - Qazaqstanda jaqyn besjyldyqta kadrlar tapshylyǵy boljanady. Bul týraly búgin Májilistegi «Nur Otan» partııasy fraktsııasy janyndaǵy Áleýmettik keńestiń otyrysynda Densaýlyq saqtaý jáne áleýmettik damý mınıstri Tamara Dúısenova málim etti.
Mınıstrdiń sózine qaraǵanda, eńbek naryǵyndaǵy ortamerzimdik ózgerister boljamy jumyspen qamtýdaǵy teńsizdiktiń oryn alý múmkindigin kórsetip otyr. «Jaqyn besjyldyq boıynsha aıtsaq, bul kezeńderde jańa jumys kúshiniń kelý qarqyny birshama báseńdeýi yqtımal. Bul negizinen sonaý 1990 jyldardyń basyndaǵy týý kórsetkishterine, demografııalyq ahýaldyń quldyrýymen tikeleı baılanysty. Bul rette eńbek naryǵyndaǵy tapshylyq negizinen jumyssyzdar, sonymen birge ózin-ózi jumyspen qamtyǵandar esebinen tolyǵýy kútiledi», - deıdi Tamara Dúısenova.
Sonymen qatar, vedomstvo basshysy búgingi tańda qazaqstandyq ózin-ózi jumyspen qamtýshylardyń basym bóligi aýyl sharýashylyǵy men saýda salasynda ekenin atap ótti. Onyń sózine qaraǵanda, olardyń negizgi bóligi ındýstrııaldyq kásiporyndarda jumys isteýge daǵdylanbaǵan. Sondyqtan da mınıstr T. Dúısenova otandyq eńbek resýrstarynyń biliktiligin arttyrýdan, olardy óndiristik jumysqa tartýdan bólek, syrttan, ıaǵnı shet elderden joǵary bilikti mamandar tartýdyń ózekti ekenin atap ótti.
