Qazaqstanda jaqsúıek-bet hırýrgııalyq kómegin kórsetýdiń jańa standarty ázirlendi
ASTANA. KAZINFORM — Qazaqstannyń Densaýlyq saqtaý mınıstrligi halyqqa jaqsúıek-bet hırýrgııalyq kómegin kórsetýdi uıymdastyrýdyń jańa standartynyń jobasyn ázirledi, dep habarlaıdy Kazinform tilshisi.
Qujat «Ashyq NQA» portalynda jarııalanyp, 2026 jylǵy 2 maýsymǵa deıin qoǵamdyq talqylaýǵa shyǵaryldy.
Jobaǵa sáıkes, jańartylǵan standartty bekitý, sondaı-aq 2020 jylǵy 20 mamyrdaǵy № QR DSM-53/2020 qoldanystaǵy buıryqtyń kúshin joıý usynylady.
Jańa qujat eldiń barlyq óńirinde jaqsúıek-bet patologııasy bar patsıentterdi emdeýge biryńǵaı tásil qalyptastyrýǵa baǵyttalǵan.
Densaýlyq saqtaý mınıstrliginiń málimetinshe, standart Dúnıejúzilik densaýlyq saqtaý uıymynyń usynymdary men EYDU elderiniń ozyq tájirıbesi negizinde ázirlengen.
Sondaı-aq vedomstvo óńirlik medıtsınalyq uıymdardyń materıaldyq-tehnıkalyq bazasyn nyǵaıtý jáne patsıentterdi baǵyttaý júıesin engizý arqyly mamandandyrylǵan kómektiń halyqqa qoljetimdi bola túskenin atap ótti.
Joba medıtsınalyq uıymdardyń menshik nysanyna qaramastan, standart talaptaryn oryndaýdy mindetteıdi.
Al onyń júzege asyrylýyn QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń aýmaqtyq departamentteri qadaǵalaıdy.
Buǵan deıin habarlanǵandaı, Almaty oblysynda hırýrgtar naýqastyń birneshe tustan synǵan bet súıegin qalpyna keltirdi.
