Qazaqstanda jaqsy jaǵdaıdaǵy jergilikti joldardyń úlesi 91%-ǵa jetti
ASTANA. KAZINFORM- Memleket basshysynyń avtomobıl joldary jelisin damytý jónindegi bastamalaryn iske asyrý aıasynda sońǵy alty jylda Qazaqstanda 31 myń shaqyrym avtomobıl joly qaıta jańǵyrtylyp, jóndeldi. Onyń ishinde 12,5 myń shaqyrym respýblıkalyq mańyzy bar jáne 18,5 myń shaqyrym jergilikti mańyzy bar joldar qamtyldy.
QR Kólik mınıstrligi baspasóz qyzmetiniń habarlaýynsha, atqarylǵan jumystardyń nátıjesinde respýblıkalyq mańyzy bar joldardyń normatıvtik jaǵdaıdaǵy úlesi 89%-dan 93%-ǵa, jergilikti joldar boıynsha 71%-dan 91%-ǵa deıin ósti. Sonymen qatar tórt jolaqty avtomobıl joldarynyń uzyndyǵy 2,3 myń shaqyrymnan 4,4 myń shaqyrymǵa deıin ulǵaıdy.
Aýqymdy jumystar jol ınfraqurylymyn jańartýmen qatar, jol júrý ýaqytyn qysqartýǵa jáne óńirlerdiń kólik qatynasynyń qoljetimdiligin arttyrýǵa múmkindik berdi.
2020-2026 jyldar aralyǵynda Kólik mınıstrligi avtomobıl joldaryn damytý jáne jańǵyrtý boıynsha keshendi jumystar júrgizdi.
Osy kezeńde «Astana – Almaty», «Taldyqorǵan – Óskemen», «Aqtóbe – Atyraý – Astrahan», «Merki – Burylbaıtal», «Qalbataý – Maıqapshaǵaı», Úlken Almaty aınalma avtomobıl joly, «Úsharal – Dostyq», «Qostanaı – Denısovka», «Podstepnoe – Fedorovka», «Uzynaǵash – Otar» jáne «Petropavl – Reseı Federatsııasynyń shekarasy» sııaqty iri jobalar aıaqtaldy.
Jýyrda Moıynty – Qyzyljar temirjol jelisindegi joldardyń túıisýi aıaqtalǵanyn habarladyq.
