Qazaqstanda jahandyq medıtsına týraly tuńǵysh ınternet-basylym paıda bolady
ASTANA. 10 shilde. QazAqparat - «Nazarbaev Ýnıversıtetiniń» Pıttsbýrg ýnıversıtetimen yntymaqtastyǵy sheńberinde Qazaqstanda bıomedıtsınalyq zertteýler boıynsha tuńǵysh ınternet-jýrnal qurylady,
dep habarlady «Nazarbaev Ýnıversıtetiniń» Ómir týraly ǵylym ortalyǵynyń bas dırektory Jaqsybaı Jumadilov pm.kz saıtyna bergen suhbatynda.
«Jahandyq densaýlyq saqtaýdyń Orta Azııalyq jýrnaly» dep atalatyn bul basylymnyń ereksheligi, onda barlyq otandyq ǵalymdar ózderiniń ǵylymı zertteýleri men ázirlemelerin kórsete alady.
«Halyqaralyq deńgeıdegi kóptegen jýrnaldar bizdiń ǵalymdarymyz úshin is júzinde qol jetkizgisiz, bul jerde tildik kedergiler de, maqala qurylymy da bar. Biz otandyq ǵalymdarmen qosa sheteldik ǵalymdar da óz zertteýlerin usyna alatyn álemdik deńgeıdegi birinshi jýrnal jasap shyǵardyq, bul jerde eń bastysy - Ortalyq Azııa óńirinde mundaı basqa basylymnyń joqtyǵy», - dep atap ótti J.Jumadilov.
Ol, sonymen qatar, jarııalanymdary aǵylshyn tilinde bolatyn basylym toqsanyna bir ret shyǵatynyn, jarııalanymdar saraptamalyq tekseristen ótetinin basa aıtty. Qazir redaktorlyq quram qurylyp, birinshi shyǵarylymǵa daıyndyq júrip jatyr. Basylym «Nazarbaev Ýnıversıtetiniń» Ómir týraly ǵylym ortalyǵy platformasyna negizdelgen.
«Atalmysh jýrnal ǵalymdarǵa jahandyq densaýlyq saqtaý salasyndaǵy kókeıkesti máselelermen bólisip, olardy tıimdi sheshý joldaryn tabýǵa múmkindik beredi dep oılaımyz. Bul ǵylymı zertteýlerdiń deńgeıin arttyrýǵa yqpal etedi», - dedi ol.
