Qazaqstanda jaǵarmaıdy molekýlalyq tańbalaý pılottyq jobasy iske qosylýy múmkin
ASTANA. KAZINFORM – Qazaqstanda munaı ónimderiniń aınalymyn baqylaýdy kúsheıtý maqsatynda jaǵarmaıdy molekýlalyq tańbalaý júıesin engizý máselesi qarastyrylyp jatyr.
Bul másele «QazMunaıGaz» ulttyq kompanııasy alańynda ótken jumys keńesinde talqylandy. Jıynǵa Energetıka vıtse-mınıstri Baqytjan Іlııas, Saýda jáne ıntegratsııa vıtse-mınıstri Áset Núsipov, memlekettik organdar men salalyq uıymdardyń ókilderi qatysty.
Keńes barysynda otyn naryǵynyń ashyqtyǵyn arttyrýǵa, munaı ónimderiniń qozǵalysyn baqylaýdy kúsheıtýge jáne zańsyz aınalymǵa qarsy kúreske baǵyttalǵan halyqaralyq tájirıbe qaraldy.
Sıngapýrlyq Nanolumi kompanııasynyń mamandary arnaıy molekýlalyq markerlerge negizdelgen tehnologııalyq sheshimdi tanystyrdy.
– Bul tehnologııa otynnyń óndiristen nemese ımporttan bastap túpkilikti tutynýshyǵa deıingi barlyq qozǵalys kezeńderin baqylaýǵa múmkindik beredi, – dep atap ótti kompanııa ókilderi.
Kezdesýde mundaı tehnologııalardy qoldanystaǵy baqylaý júıelerine engizý jáne munaı ónimderiniń aınalymyn monıtorıngteý tetikterin jetildirý máseleleri talqylandy.
Sondaı-aq qatysýshylar shetelderde molekýlalyq tańbalaý júıesin qoldaný tájirıbesimen tanysty.
Keńes qorytyndysy boıynsha taraptar usynylǵan tásilder boıynsha pikir almasyp, Qazaqstan zańnamasynyń talaptaryn eskere otyryp pılottyq jobany iske asyrý týraly sheshim qabyldady.
– Energetıka mınıstrligi memlekettik retteýdiń tıimdiligin arttyrýǵa jáne munaı ónimderi naryǵynyń ashyqtyǵyn qamtamasyz etýge baǵyttalǵan zamanaýı tehnologııalyq sheshimderdi zerdeleý jumysyn jalǵastyrady, – delingen habarlamada.
Aıta keteıik, Astanada elektrondyq júıe kommýnaldyq qyzmettiń janarmaı shyǵynyn azaıtty.
