Qazaqstanda jabaıy ań-qus ósirýge ruqsat berilýi múmkin

ASTANA. KAZINFORM – Májilis depýtattarymen birge ań ósirý áleýetin iske asyrýdy kózdeıtin zań jobasyna bastama jasaldy. Bul týraly Ekologııa jáne tabıǵı resýrstar mınıstri Erlan Nysanbaev aıtyp berdi.

– Shet elderdiń ań-qus ósirý tájirıbesi kórsetkendeı, jabaıy janýarlardy qoldan ósirý olardyń sanynyń artýyna, tabıǵattaǵy janýarlarǵa túsetin qysymdy azaıtýǵa, túrlerdi saqtap qalýǵa jáne tabıǵattaǵy tepe-teńdik pen ártúrlilikti qorǵaýǵa kómektesedi. Máselen, Batys Eýropada shamamen 10 myń fermada 700 myńnan astam tuıaqty janýar ósiriledi, Jańa Zelandııada maral men buǵylardyń 800 myńnan astamy torly qorshaýda, al Namıbııada 35 mln gektarǵa jetetin 5 myń ranchosynda 500 myńnan astam túrli tuıaqty janýar ósirilýde, – dedi Erlan Nysanbaev.

Osylaısha, elimizde ań-qus ósirý ónimderin aýylsharýashylyq ónimderine teńestirý usynylyp otyr. Bul aýyl sharýashylyǵy salasyn qoldaý sharalaryn paıdalanýǵa, torly qorshaýda ósiriletin jabaıy janýarlarǵa veterınarııalyq baqylaýdy qamtamasyz etýge múmkindik beredi.

Sondaı-aq, jabaıy ań-qusty ósirýge ruqsat alý tártibin jeńildetý, fermerlik ańshylyq sharýashylyqtarǵa memlekettik tabıǵı qoryqshalarda jabaıy janýar ósirýge ruqsat berý usynylǵan.

Buǵan deıin Erlan Nysanbaev Qazaqstanǵa Nıderlandydan jetkizilgen jolbarystardyń alǵashqy qysy qalaı ótip jatqanyn aıtyp berdi.

Sondaı-aq, aldaǵy bes jylda Eýropadan Qazaqstanǵa 40 Prjevalskıı jylqysy ákelinedi.

Budan bólek, Qazaqstannyń Qyzyl kitabyna taǵy 11 janýar túri engiziledi.