Qazaqstanda zeınetkerlerge onlaın nesıe rásimdeýge tyıym salyndy
ASTANA. KAZINFORM — Bul týraly Ulttyq bank tóraǵasy Tımýr Súleımenov brıfıngte málimdedi.
Onyń aıtýynsha, bul talap azamattardyń eń osal sanatyn qarjylyq alaıaqtyqtan qorǵaý maqsatynda engizilgen.
— Egde jastaǵy azamattar, ásirese zeınetkerler nemese zeınet jasyna taıaǵan adamdar nesıe alý úshin mindetti túrde bank bólimshesine jeke kelýi kerek. Bul jerde jaýapkershilik bank menedjerine júkteledi. Eger ol adamnyń alaıaqtardyń yqpalynda bolýy múmkin ekenin baıqasa, nesıe ne úshin qajet ekenin suraıdy. Al klıent «maǵan bireý habarlasyp, nesıe alýdy aıtty» dese, bank mundaı jaǵdaıda nesıeni bermeýge mindetti, — dedi Tımýr Súleımenov.
Ulttyq bank tóraǵasynyń aıtýynsha, bul talaptardyń saqtalýyn Qarjy naryǵyn retteý jáne damytý agenttigi qadaǵalaıdy. Agenttik bankterge josparly tekserýler júrgizip, talaptardyń oryndalýyn baqylaıdy.
Eske salaıyq, 2027 jylǵy 1 qańtardan bastap Qazaqstanda qaryz alýshylardyń boryshtyq júktemesin baǵalaýdyń jańa kórsetkishi — qaryzdyń tabysqa araqatynasy koeffıtsıenti engiziledi. Endi bankter nesıe berý kezinde osy kórsetkishti de eskeretin bolady.
