Qazaqstanda zeınetaqynyń ortasha kólemi qandaı

ASTANA. QazAqparat – 1 jeltoqsandaǵy jaǵdaı boıynsha, Qazaqstanda zeınetaqynyń ortasha kólemi 109 myń teńgege jýyqty quraıdy. Bul týraly Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.

Bıylǵy 11 aıda qazaqstandyqtarǵa 2,7 trln teńgeden astam somaǵa zeınetaqy tólendi. Tek qarasha aıynda ǵana 245,9 mlrd teńgege zeınetaqy tólendi, onyń ishinde bazalyq zeınetaqyny tóleýge – 74,9 mlrd teńge, yntymaqty zeınetaqyny tóleýge – 171 mlrd teńge bólindi.

2022 jylǵy 1 jeltoqsandaǵy jaǵdaı boıynsha eldegi zeınetkerler sany – 2 mln 276 myń adam.

«1 jeltoqsandaǵy jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) 108 960 teńge boldy», - delingen vedomstvo málimetinde.

2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz.

Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady.