Qazaqstanda zeınetaqy jınaǵyn esepteýdiń jańa fýnktsııasy paıda boldy
Qor jarııalaǵan aqparatqa sáıkes boljamdy zeınetaqy kalkýlıatory bolashaq zeınetaqyny josparlaý quraly.
Atalǵan qural salymshyǵa zeınetaqy tólemderiniń boljaldy mólsherin esepteýge múmkindik beredi. Mysaly:
• memlekettik bıýdjet (bazalyq zeınetaqy jáne ortaq (eńbek) zeınetaqy);
• BJZQ-ǵa jumyskerlerdiń tabysynan tólenetin 10% mindetti zeınetaqy jarnalary;
• 5% mindetti kásiptik zeınetaqy jarnalary. Ony jumys berýshi BJZQ-ǵa eńbek jaǵdaıy qaýipti, zııandy jumyspen aınalysatyn jumyskerlerdiń paıdasyna aýdarady;
• erikti zeınetaqy jarnalary.
Habarlamada aıtylǵandaı salymshylar úshin zeınetaqy kalkýlıatorynda jańa fýnktsııalar paıda boldy.
Birinshiden, zeınetaqy kalkýlıatory jınaqtardy alý josparlanǵan jaǵdaıda zeınetaqy tólemderin esepteýge múmkindik beredi. Paıdalanýshy ózdiginen kelesi tetikterdi tańdaı alady:
- zeınetaqy jınaqtaryn alatyn jyly jáne qalaǵan somasy,
- alynǵan somadan jeke tabys salyǵyn (JTS) bir ret ustap qalý (tolyq kólemde, BJZQ-dan jınaqtardy alý kezinde) nemese aı saıyn (BJZQ-dan zeınetaqy tólemderin alý kezinde teń úlestermen).
Ekinshiden, kalkýlıatorǵa zańnamada kózdelgen túzetý koeffıtsıentin eskere otyryp, qaýipti jáne zııandy óndiristerde keminde 60 aı jumys istegen qyzmetkerler úshin BJZQ-dan tólenetin tólemderdi kótermeleý esebi qosyldy.
Úshinshiden, kalkýlıator zeınetaqy jınaqtarynyń bir bóligin ınvestıtsııalyq portfeldi basqarýshylarǵa (IPB) aýdarǵan jaǵdaıda zeınetaqy tólemderiniń qozǵalysyn kórýge múmkindik beredi.
Esterińizge sala ketsek, zeınetaqyny esepteý úshin «Negizgi derekter» blogynda jeke málimetterdi (týǵan kúni, jynysy, eńbek ótili, jınaq somasy jáne t.b.) toltyrý qajet. Eger enpf.kz saıtyndaǵy jeke kabınette aldyn ala tirkelgen bolsańyz, kalkýlıatorda da avtomatty túrde toltyrylady.
«Nátıje sizdiń boljamdy zeınetaqy blogynda kórsetiledi. Zeınetke shyǵý jasy men kúnin, jınaqtar taýsylǵanǵa deıingi jyldar sanyn (BJZQ-dan tólemder alǵan jaǵdaıda), zeınetke shyǵý sátindegi jalaqynyń boljamdy mólsherin jáne tabysty boljamdy zeınetaqyǵa aýystyrý koeffıtsıentin qamtıdy. Sonymen qatar ketse túrinde kórsetilgen jyldar boıynsha boljamdy zeınetaqynyń ózgerý úderisi de qamtylady», - delingen habarlamada.
Sondaı-aq zeınetaqy qorynan salymshy bolashaq zeınetaqysynyń shamasyn baǵalap, boljaýǵa bolatyndyǵy aıtylǵan.
«Zeınetaqyny esepteý nátıjeleri kepildendirilgen tólem emes, ol boljam. Árbir salymshynyń bolashaq zeınetaqysynyń mólsheri onyń zeınetaqy jınaqtaryna baılanysty ekenin eskerý qajet. Jınaqtardyń kólemine eń aldymen, zeınetaqy jarnalarynyń mólsheri, olardy tóleýdiń júıeliligi men tolyqtyǵyna baılanysty. Sondaı-aq, ınvestıtsııalyq tabysta áser etedi. Boljamdy zeınetaqy kalkýlıatorynyń barlyq eseptik nátıjeleri naqty qundyq mánde usynylady», - dep habarlaıdy zeınetaqy qorynan.
