Qazaqstanda zeınetaqy jınaqtaryna memlekettik kepildik shyǵyny eki esege jýyq azaıdy
ASTANA. KAZINFORM – 2025 jyly memleket Biryńǵaı jınaqtaýshy zeınetaqy qoryndaǵy (BJZQ) zeınetaqy jınaqtarynyń saqtalýyna beriletin kepildik tólemderine 16,1 mlrd teńge jumsady. Bul ótken jylmen salystyrǵanda shamamen eki esege az, dep habarlaıdy Birinshi nesıe bıýrosy.
Bul qarajatty 108,2 myń adam alǵan. Tıisti málimet QR Eńbek jáne halyqty áleýmettik qorǵaý mınıstrliginiń saıtynda jarııalanǵan esepte keltirilgen.
Atalǵan tólemder respýblıkalyq bıýdjetten zeınetaqy men járdemaqylarǵa bólingen jalpy shyǵynnyń nebári 0,3 paıyzyn qurady. Byltyr bul maqsatqa 143,2 myń adam úshin 27 mlrd teńge bólingen bolatyn. Ol jalpy shyǵynnyń 0,5 paıyzyna teń edi.
Zeınetaqy men járdemaqylarǵa jumsalǵan 5,86 trln teńgeniń 72,1 paıyzy nemese 4,23 trln teńgesi yntymaqty jáne bazalyq zeınetaqy tólemderine baǵyttalǵan.
Kópbalaly analar men múgedektigi bar azamattarǵa tólenetin járdemaqylardyń úlesi 17,8 paıyzdy nemese 1,04 trln teńgeni qurady. Qalǵan 15 túrli áleýmettik tólemge 591,3 mlrd teńge, ıaǵnı jalpy shyǵynnyń 10,1 paıyzy jumsaldy. Onyń ishinde zeınetaqy jınaqtarynyń saqtalýyna kepildik tólemderiniń úlesi shamamen 0,3 paıyz boldy. Bul jerleýge beriletin járdemaqylarǵa jumsalǵan 15,4 mlrd teńgemen shamalas.
— Zeınetaqy jarnalarynyń saqtalýyna beriletin memlekettik kepildik tólemi bir ret tólenedi. Ol salymshy zeınetke shyqqan kezde mindetti zeınetaqy jarnalary (MZJ) jáne/nemese mindetti kásiptik zeınetaqy jarnalary (MKZJ) boıynsha jınaqtalǵan qarajattyń ınflıatsııany eskergendegi mólsheri naqty jınaq somasynan az bolǵan jaǵdaıda taǵaıyndalady. Osy aıyrmany memleket óteıdi. 2027 jylǵy 1 qańtardan bastap Áleýmettik kodekske engizilgen ózgerister kúshine enedi. Soǵan sáıkes memleket BJZQ-daǵy mindetti jáne mindetti kásiptik zeınetaqy jarnalarynyń ınflıatsııa deńgeıinde saqtalýyna kepildik berýdi toqtatady. Osyǵan baılanysty tıisti bıýdjettik kishi baǵdarlama ońtaılandyrylady, — delingen habarlamada.
Aıta keteıik, mindetti zeınetaqy jarnalary qyzmetkerdiń aı saıynǵy tabysynyń 10 paıyzy mólsherinde aýdarylady. Al zııandy eńbek jaǵdaıynda jumys isteıtin azamattar úshin engizilgen mindetti kásiptik zeınetaqy jarnalarynyń kólemi aılyq tabystyń 5 paıyzyn quraıdy.
Osyǵan deıin 2027 jyldan bastap zeınetaqy júıesinde birqatar ózgeris engiziletini týraly jazdyq.
