Zeınetaqy jınaǵynyń jetkilikti shegin esepteýdiń jańa tártibi bekitildi
ASTANA. KAZINFORM — Qazaqstan Úkimeti zeınetaqy jınaqtarynyń eń tómengi jetkilikti shegin esepteýdiń jańa tártibin bekitti. Tıisti qaýlyǵa Premer-mınıstr Oljas Bektenov qol qoıdy.
Qujatqa sáıkes, endi zeınetaqy jınaǵynyń eń tómengi jetkilikti shegin anyqtaý kezinde birneshe negizgi kórsetkish eskeriledi. Atap aıtqanda, jyldyq tabystylyq mólsherlemesi 9% bolyp belgilendi. Al mindetti zeınetaqy jarnalary esebinen tólenetin aı saıynǵy tólemderdiń jyl saıynǵy ósimi 8% deńgeıinde esepke alynady.
Zeınetaqy jınaǵynyń eń tómengi jetkilikti shegi arnaıy formýla arqyly esepteledi:
PMDx0 = 12 × PVx0 × äx0
- x0 — salymshynyń jasy;
- PV — aı saıynǵy eń tómengi tólem mólsheri;
- ä — zeınet jasyna jetkennen keıin ómir boıy tólenetin tólemderdiń búgingi qunyn esepteýge arnalǵan koeffıtsıent.
Qujatta eń tómengi jetkilikti shek aldyńǵy jylǵy deńgeıden tómen bolmaýy tıis ekeni kórsetilgen. Sonymen qatar ol ınflıatsııa deńgeıinen 5 paıyzdyq tarmaqqa joǵary mólshermen qaıta esepteledi.
Qaýly resmı jarııalanǵan kúnnen bastap 10 kún ótken soń, ıaǵnı 4 maýsymnan bastap kúshine enedi.
Buǵan deıin Eńbek jáne halyqty áleýmettik qorǵaý vıtse-mınıstri Erbol Tuıaqbaev Senattaǵy brıfıngte zeınetaqy jınaǵyn merziminen buryn alýǵa arnalǵan shek bıyl ósýi múmkin ekenin aıtqan edi.
Sondaı-aq Ulttyq bank zeınetaqy jınaǵyn merziminen buryn alýǵa qoıylatyn talaptardy kúsheıtý josparlanyp otyrǵanyn habarlaǵan bolatyn. Bul bolashaqtaǵy zeınetaqy tólemderiniń kólemin arttyrýǵa baǵyttalǵan.
