Qazaqstanda zeınetaqy taǵaıyndaý jáne tóleý tártibi ózgeredi
ASTANA. KAZINFORM — Qazaqstannyń Eńbek jáne halyqty áleýmettik qorǵaý mınıstri zeınetaqy tólemderiniń mólsherin esepteý, taǵaıyndaý, qaıta esepteý, qaıta bastaý jáne toqtatý qaǵıdalaryna ózgerister engizdi.
Tıisti buıryqqa 2026 jylǵy 26 mamyrda qol qoıyldy.
Qujatqa sáıkes, zeınetaqy taǵaıyndaý rásimderiniń bir bóligi tsıfrlyq formatqa kóshiriledi.
Zeınetaqy taǵaıyndaý kezinde qajetti málimetter memlekettik aqparattyq júıeler arqyly alynady.
Olardyń qatarynda jeke tulǵalar týraly memlekettik derekter qory, azamattyq hal aktilerin tirkeý organdarynyń málimetteri, qorǵanshylyq jáne qamqorshylyq júıeleri, Joǵarǵy sot pen Memlekettik kirister komıtetiniń aqparattyq bazalary bar.
Ótinishti qaǵaz túrinde de, elektrondy formatta da berýge bolady.
Eger qajetti aqparat memlekettik derekqorlarda bolmasa, azamat rastaıtyn qujattardy ózi usynýy tıis.
Jańa ózgeristerge sáıkes, qosymsha qujattardy tapsyrý qajettigi týraly habarlama azamattarǵa jańa tártippen joldanady.
Mundaı habarlamalar qysqa mátindik habarlama arqyly da jiberiledi.
Jetpeıtin qujattardy usynýǵa 25 jumys kúni beriledi.
Sondaı-aq artyq tólengen zeınetaqy qarajatyn qaıtarý tártibi naqtylandy.
Qarajat alýshynyń ótinishi boıynsha, Memlekettik korporatsııanyń qujattary negizinde nemese sot sheshimimen qaıtarylýy múmkin.
Ózgerister qarttar men múgedektigi bar adamdarǵa arnalǵan arnaýly áleýmettik qyzmet kórsetý ortalyqtarynda tolyq memlekettik qamqorlyqta turatyn azamattarǵa da qatysty.
Zeınetaqy tólemderin toqtatý nemese qaıta bastaý týraly sheshimder memlekettik aqparattyq júıelerdegi málimetter negizinde qabyldanady.
Qujatqa sáıkes, tólem júrgizilip jatqan zeınetaqy isteri qoldanystaǵy ister muraǵatynda saqtalady.
Al zeınetaqy isteriniń elektrondyq nusqalary ýákiletti organnyń tsıfrlyq júıesinde merzimsiz saqtalady.
Ózgeristerdiń basym bóligi 2026 jylǵy 12 shildeden bastap kúshine enedi.
Jekelegen normalar 2026 jylǵy 13 maýsymnan bastap qoldanysqa engiziledi.
Osyǵan deıin habarlaǵanymyzdaı, zeınetaqy jınaǵynyń jetkilikti shegin esepteýdiń jańa tártibi bekitildi.
