Qazaqstanda zeınetaqy ómir boıyna tólenýi múmkin

ASTANA. KAZINFORM – Qazaqstanda jumys berýshiler tóleıtin mindetti zeınetaqy jarnalarynyń qurylymy ózgerýi múmkin. BJZQ AQ basqarma tóraǵasy Janat Qurmanov zeınetkerlerdiń 80 jastan asqan kezeńdegi tabysyn qamtamasyz etýge baǵyttalǵan «4+1» modelin tanystyrdy.

Bul bastama zeınetaqy jınaǵy taýsylǵan shaqta egde jastaǵy adamdardyń materıaldyq jaǵdaıynyń tómendep ketpeýiniń aldyn alýdy kózdeıdi.

– Usynys boıynsha, jumys berýshiniń 5 paıyzdyq mindetti zeınetaqy jarnasynyń 4 paıyzyn jeke zeınetaqy shottaryna, al 1 paıyzyn ortaq shotqa baǵyttaý kózdelip otyr. Bul keleshegi bar usynys dep sanaımyz. Sońǵy jyldary biz memlekettik organdarmen, Ulttyq bankpen jáne Qarjy naryǵyn retteý jáne damytý agenttigimen birlesip, osy modeldi muqııat qarap jatyrmyz, – dedi Janat Qurmanov.

Mundaı qadamnyń qajettiligi adamdardyń ómir súrý uzaqtyǵynyń artýymen baılanysty. 

Statıstıka boıynsha, zeınetke shyqqannan keıingi ortasha ómir súrý jasy 79–81 jasty quraıdy. Osy jastan asqanda kóptegen azamattardyń jınaǵy taýsylyp, olar tek memleket beretin bazalyq zeınetaqyǵa ǵana qarap qalady.

– Zeınetaqy jınaqtary qanshalyqty kóp bolsa da, ýaqyt óte kele sarqylady. 80 jastan asqannan keıin adam is júzinde tek memlekettik qoldaýmen qalady jáne tabysty almastyrý koeffıtsıenti kúrt tómendeıdi. Halyqaralyq tájirıbede buǵan úlken mán beriledi, óıtkeni 80 jastan keıin adamdardyń turaqty zeınetaqy tabysyna degen qajettiligi arta túsedi. Sondyqtan jınaqtar taýsylǵannan keıin de turaqty tólemdi qamtamasyz etý óte mańyzdy, – dep atap ótti Qor basshysy.

Eske sala keteıik, buǵan deıin Eńbek mınıstrligi zeınetaqy jınaǵyn merziminen buryn alýdyń jetkiliktilik shegin kóterý máselesin qarastyryp jatqanyn habarlaǵan bolatyn.