Qazaqstanda zeınetaqy men járdemaqy kóbeıdi
ASTANA.KAZINFORM - 2026 jylǵy 1 qańtardan bastap memlekettik járdemaqylardyń, bazalyq jáne yntymaqty zeınetaqylardyń barlyq túriniń mólsheri QR Ulttyq banki aıqyndaıtyn ınflıatsııanyń boljamdy deńgeıine sáıkes 10%-ǵa ulǵaıtyldy. Bul týraly Eńbek jáne halyqty áleýmettik qorǵaý mınıstrligi habarlady.
Budan basqa, Memleket basshysynyń tapsyrmasy boıynsha 2023 jyldan bastap bes jyl ishinde eń tómengi bazalyq zeınetaqyny eń tómengi kúnkóris deńgeıiniń 70%-yna deıin, al eń joǵarǵysyn 120%-ǵa deıin jyl saıyn kezeń-kezeńimen arttyrý isi júzege asyrylyp jatyr.
Máselen, 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńge (eń tómengi kúnkóris deńgeıiniń 70%-y), eń joǵary mólsheri eń tómengi kúnkóris deńgeıiniń 110%-ynan 118%-yna deıin artyp, 60 005 teńge bolady.
Mysaly, 2019 jyly zeınetkerlik demalysqa shyqqan 70 jastaǵy zeınetkerdiń bıýdjetten tólenetin zeınetaqysynyń mólsheri 2025 jyly 171 588 teńge boldy, onyń ishinde bazalyq zeınetaqy tólemi – 50 851 teńge, yntymaqty zeınetaqy – 120 737 teńge. 2026 jylǵy 1 qańtardaǵy arttyrýdy eskere otyryp, osy zeınetker úshin zeınetaqynyń jalpy somasy 192 816 teńgege deıin ulǵaıady, onyń ishinde bazalyq zeınetaqy – 60 005 teńge, yntymaqty zeınetaqy 132 811 teńge bolady. Atalǵan somalarǵa BJZQ tólemderi kirmeıtinin atap ótken jón.
2026 jylǵy 1 qańtardan bastap memlekettik járdemaqylar mólsheriniń ulǵaıýyna birneshe mysal:
· 1, 2, 3 bala týǵanda beriletin járdemaqy 149 416 teńgeden 164 350 teńgege deıin, 4 jáne odan da kóp bala týǵanda – 247 716 teńgeden 272 475 teńgege deıin ulǵaıady;
· mólsheri bala sanyna baılanysty kópbalaly otbasylarǵa beriletin járdemaqy 4 balasy bar otbasylar úshin 63 030 teńgeden 69 330 teńgege deıin, 10 balasy barlarǵa – 157 280 teńgeden 173 000 teńgege deıin ulǵaıady;
· I toptaǵy múgedektigi bar adamdarǵa arnalǵan járdemaqy 101 702 teńgeden 111 872 teńgege deıin, II toptaǵylarǵa – 81 362 teńgeden 89 498 teńgege deıin, III toptaǵylarǵa – 55 474 teńgeden 61 021 teńgege deıin ulǵaıady.
Sondaı-aq Memlekettik áleýmettik saqtandyrý qorynan (budan ári – MÁSQ) tólenetin asyraýshysynan aıyrylý jáne eńbek etý qabiletinen aıyrylý boıynsha tólemder de 10%-ǵa artty. Bul tólemder mindetti áleýmettik saqtandyrý júıesine qatysýshylarǵa bıýdjetten tólenetin memlekettik járdemaqylarǵa qosymsha júzege asyrylady.
Tólemderdiń mólsheri jeke dara bolyp tabylady jáne sońǵy 2 jylda MÁSQ-qa áleýmettik aýdarymdar júrgizilgen ortasha aılyq tabysqa, eńbek etý qabiletinen aıyrylý koeffıtsıentterine, asyraýyndaǵy adamdar sanyna, mindetti áleýmettik saqtandyrý júıesine qatysý ótiline jáne tabysty almastyrýǵa baılanysty bolady.
Buǵan deıin Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Dámejan Sádýaqasova 2026 jyldyń 1 qańtarynan bastap zeınetaqy tólemderi men járdemaqylardyń qanshalyqty artatynyn túsindirgen edi.