Qazaqstanda zeınetaqy annýıteti boıynsha tólemder 81,5 mlrd teńgege jetti

QR Eńbek jáne halyqty áleýmettik qorǵaý mınıstrligi zeınetaqymen qamsyzdandyrýdyń osy tetigi qalaı jumys isteıtinin jáne kelisimshart jasasý úshin qandaı talaptar qoıylatynyn túsindirdi.

Zeınetaqy annýıteti boıynsha azamat óziniń zeınetaqy jınaqtaryn ómirdi saqtandyrý kompanııasyna aýdarady. Al kompanııa oǵan ómir boıy turaqty tólem jasap otyrýǵa mindetteme alady. ıAǵnı tólemder adamnyń búkil ómiri boıy jalǵasady. Tipti tólemderdiń jalpy somasy bastapqyda aýdarylǵan qarajattan asyp ketse de, saqtandyrý kompanııasy tólem jasaýdy toqtatpaıdy.

Zeınetaqy annýıteti boıynsha kelisimshart jasaý úshin azamat belgilengen jasqa tolyp, zeınetaqy jınaǵynda jetkilikti qarajat bolýy kerek. Qajetti soma ár adamǵa jeke esepteledi. Bul rette azamattyń jasy men bolashaq tólemderdiń mólsheri eskeriledi.

2026 jyly zeınetaqy annýıtetin rásimdep, tólemderdi birden ala alady: erler – 55 jastan bastap, áıelder – 53 jastan. Al mindetti kásiptik zeınetaqy jarnalary keminde 60 aı boıy tólengen azamattar jetkilikti jınaǵy bolǵan jaǵdaıda 50 jastan bastap tólem ala alady.

Budan bólek, keıinge qaldyrylǵan zeınetaqy annýıteti de bar. Mundaı kelisimshart arqyly bolashaq tólemderdiń sharttaryn aldyn ala belgileýge bolady. Ony 45 jastan bastap, al mindetti kásiptik zeınetaqy jarnalary keminde 60 aı boıy tólengen jaǵdaıda 40 jastan bastap rásimdeýge bolady. Bul rette tólemder zańnamada jáne kelisimshartta belgilengen jasqa jetkennen keıin bastalady.

Zeınetaqy annýıteti boıynsha saqtandyrý tólemderi jyl saıyn ósip otyrady. Zańnamada belgilengen ındeksatsııa mólsheri keminde 8%-dy quraıdy. Al tólemderdiń naqty mólsheri men sharttary kelisimshartta kórsetiledi.

Sonymen qatar kelisimshartta tólemderge kepildik beriletin kezeńdi qarastyrýǵa bolady. Eger saqtandyrylǵan adam osy kezeń aıaqtalǵanǵa deıin qaıtys bolsa, tólemder kelisimshartta kózdelgen tártip pen sharttarǵa sáıkes muragerlerine beriledi. Bul tetikti BJZQ-daǵy zeınetaqy jınaǵynyń qalǵan bóligin muraǵa qaldyrý tártibimen shatastyrmaǵan jón. Bular – eki bólek másele.

Zeınetaqy annýıteti boıynsha tólem alyp júrgen azamat jumysyn jalǵastyra alady. Alaıda annýıtet rásimdeý memlekettik zeınetaqyny merziminen buryn taǵaıyndaýdy bildirmeıdi. Memlekettik zeınetaqy alý quqyǵy zańnamada belgilengen talaptarǵa sáıkes anyqtalady.

QR Eńbek jáne halyqty áleýmettik qorǵaý mınıstrligine qarasty Memlekettik annýıtettik kompanııa da zeınetaqy annýıteti boıynsha qyzmet kórsetedi. Kompanııa azamattarǵa zeınetaqy jınaǵynyń jetkiliktiligin esepteý jáne bolashaq tólemderdiń mólsherin anyqtaý boıynsha keńes beredi.

Kelisimshart jasamas buryn azamattarǵa saqtandyrý uıymdarynyń usynystaryn salystyryp, onyń talaptaryn muqııat zerdeleý usynylady. Ásirese bastapqy tólem mólsherine, tólemderdiń jyl saıyn ósý tártibine, kepildik kezeńine jáne kelisimshartty ózgertý sharttaryna nazar aýdarǵan jón. Aldyn ala esepti ómirdi saqtandyrý kompanııasynan alýǵa bolady. Sondaı-aq BJZQ-dan boljamdy túrde alatyn tólemder men saqtandyrý kompanııasy usynatyn tólemderdi salystyrý úshin enpf.kz saıtyndaǵy boljamdy zeınetaqy kalkýlıatoryn paıdalanýǵa bolady.

Osyǵan deıin Qazaqstanda zeınetaqy jınaǵyn ınvestıtsııalyq portfeldi basqarýshylarǵa (IPB) berý tártibi ózgergennen keıin qansha ótinish túskeni týraly jazdyq.