Qazaqstanda zerthanalar men sertıfıkattaý uıymdaryn baǵalaý qashyqtan júrgizile bastady
ASTANA. KAZINFORM – Qazaqstanda zerthanalar, sertıfıkattaý jáne ınspektsııalyq uıymdar mindetti baǵalaýdyń bir bóligin qashyqtan óte bastady. Ulttyq akkredıtteý ortalyǵy osy formatta 32 baǵalaý júrgizdi, dep habarlaıdy Saýda jáne ıntegratsııa mınıstrligi.
Qashyqtan baǵalaýǵa kóshý ulttyq akkredıtteý júıesin tsıfrlandyrýdyń kezekti kezeńi bolyp otyr. Jańa tetik bıznes úshin ýaqyt pen uıymdastyrýshylyq shyǵyndardy azaıtýǵa, ákimshilik júktemeni tómendetýge jáne memlekettik resýrstardy tıimdi paıdalanýǵa múmkindik beredi.
Bul rette akkredıtteýdiń táýelsizdik, quzyrettilik jáne nátıjelerdiń shynaıylyǵy sııaqty negizgi qaǵıdattary ózgerissiz qalady.
– 2026 jyly qashyqtan baǵalaý ekinshi josparly baǵalaý kezinde pılottyq rejımde júrgiziledi. Al 2027 jyly Ulttyq akkredıtteý ortalyǵy bul tájirıbeni keńeıtip, qashyqtan baǵalaý formatyn barlyq josparly baǵalaýlarǵa taratýdy josparlap otyr, – dep atap ótti sarapshylar.
Sonymen qatar baǵalaýdy qashyqtan júrgizý mindetti emes. Bul tetik belgilengen talaptarǵa sáıkes keletin jáne qashyqtan ózara is-qımyl jasaýǵa qajetti tehnıkalyq múmkindikteri bar akkredıtteý sýbektilerine ǵana qoldanylady.
– Qashyqtan baǵalaý protsedýralardyń obektıvtiligin, táýelsizdigin jáne sapasyn joǵary deńgeıde saqtaýǵa múmkindik beredi. Búginde osy formatta 32 baǵalaý júrgizildi, – delingen habarlamada.
Jańa formatty engizý úshin Ulttyq akkredıtteý ortalyǵy ádistemelik qujattar toptamasyn ázirledi. Onyń ishinde «Qashyqtan baǵalaý» jumys nusqaýlyǵy, baǵalaýshylarǵa arnalǵan usynymdar jáne akkredıtteý sýbektilerine arnalǵan keri baılanys saýalnamasy bar.
Bul qashyqtan baǵalaýdy júrgizýdiń biryńǵaı, ashyq ári túsinikti tásilin qalyptastyrýǵa, sondaı-aq jınaqtalǵan tájirıbe men protseske qatysýshylardyń keri baılanysy negizinde jańa tetikti jetildirýge múmkindik beredi.
Aıta keteıik, kásipker áıelderdi qarjylandyrýdy baqylaıtyn ulttyq tsıfrlyq platforma iske qosyldy.
