Qazaqstanda zeń aýrýlaryna qarsy otandyq preparat shyqty
ALMATY. QazAqparat - Qazaqstanda zeń aýrýlaryna qarsy otandyq preparat shyqty, dep habarlaıdy QazAqparat tilshisi. Bul týraly Almatyda ótken baspasóz máslıhaty barysynda belgili boldy.
Joba avtory QR BǴM Ǵylym komıteti Mıkrobıologııa jáne vırýsologııa ınstıtýtynyń bas dırektory Amangeldi Sadanov.
Dári óndirisi 20 jylǵa sozylǵan.
«Sońǵy úsh jylda dárigerler komandasy dáriniń tıimdiligin dáleldeıtin málimetter bazasy jasaldy. Klınıkalyq synaqtyń eki fazasy Almatydaǵy Ǵylymı zertteý ınstıtýtynda ótti. Úshinshi faza qalalyq jáne oblystyq teri jáne jynys joldary dıspanseri bazasynda ótti. Sońǵy synaq kezinde «Klotrımazol» preparatymen salystyrǵanda qazaqstandyq preparat «Rozeofýngın» 20 paıyzǵa tıimdirek bolyp shyqty. Paıdalanǵan 1 000 adam 99,7%-y teri zeńinen qutyldy», - dedi oblystyq teri jáne jynys aýrýlary dıspanseriniń dermatolog dárigeri Aıjan Itemırova.
Dáriniń bir syqpasy 2 000 teńge turady. Bul sheteldik balama ónimderden anaǵurlym arzan deıdi mamandar.
«Jaqpa maı deneniń syrtyna qoldanylady. Negizgi áser etýshi komponent - Rozeofýngın polıen antıbıotıgi, kómekshi komponent - polıetılenglıýkol. Polıen antıbıotıgine adam aǵzasy baıaý úırenedi, ıaǵnı bul preparat tıimdi bolady degen sóz», - dedi ınstıtýttyń antıbıotıkter zerthanasynyń meńgerýshisi Asıa Balǵymbaeva.
Bul preparat ınstıtýttyń zerthanasynda jasalyp jatyr. Jaqynda óndiriske shyǵarylady.
«Dıstrıbıýtorlardan usynys túsip jatyr. Biraq ázirge ózimiz shyǵara alamyz. Zaýyttyń qýattylyǵy jylyna 10-15 myń tıýbık dári shyǵarýǵa kómektesedi. Kelesi jylǵa kólemdi ulǵaıtýǵa tyrysamyz. Rozeofýngın - tirkelgen taýarlyq belgi. DSU patenty men QR DSM Farmatsııa komıtetiniń tirkeýi bar», - dedi A. Sadanov.
