Qazaqstanda záıtún men banan ósirý jobalary keńeıtilýi múmkin

ASTANA. KAZINFORM — Aýyl sharýashylyǵy vıtse-mınıstri Azat Sultanov Qazaqstan aýmaǵynda záıtún men banan ósirý jobalaryna qatysty pikir aıtty.

Onyń sózinshe, Túrkistan oblysynda myń tonnaǵa jýyq banan óndirýge baǵyttalǵan ınvestıtsııalyq joba júzege asyryldy. Bul Qazaqstan Respýblıkasyna ımporttalatyn jalpy banannyń shamamen bir paıyzyn quraıdy.

«Qazirgi kezde baǵa konektýrasyn, ónimdi jetkizý shyǵyndaryn eskere otyryp, bul banan quny ishki naryqtaǵy baǵamen básekege qabiletti bolýy múmkin. Tipti, elimizde ósirilgen osy ónim jyldam satylyp ketedi degen jarnama aıtylyp jatyr, ıaǵnı iri saýda oryndary iri kólemde alýǵa múddeli eken. Máselen, Reseı Federatsııasy bizdiń klımattyq jaǵdaıda jeke kompanııanyń banan sııaqty básekege qabiletti ónim ósirýi tájirıbesine nazar aýdaryp otyr», — dedi A. Sultanov Senatta tilshiler suraǵyna jaýap bere otyryp.

Onyń aıtýynsha, Túrkistan oblysynda záıtún ósirý boıynsha jospar bar.

«Munymen qosa, batysta da záıtún aǵashyn ósirýge arnalǵan ınvestıtsııalyq jobany júzege asyrýdy josparlap otyrmyz. Biz eksperıment júrgizdik, jaqsy kórsetkishter bar», — dedi vıtse-mınıstr.

Eske salsaq, jaqynda buqaralyq aqparat quraldarynda Reseıdiń Aýyl sharýashylyǵy mınıstrligi Qazaqstannyń banan ósirýdegi tájirıbesine nazar aýdaryp otyrǵany jaıynda málimet tarady.

Bıyl kóktemde Túrkistan oblysynda ósirilgen banandar mamyr aıynda satylymǵa shyǵatynyn jazǵan edik.

Osyǵan deıin Túrkistandyq sharýalar ekzotıkalyq jemisterdi ósirýdi qolǵa ala bastaǵany habarlandy. 

Byltyr kúzde Mańǵystaý oblysynda tájirıbe túrinde 2 myń túp záıtún aǵashy egilgeni jarııalandy.