Qazaqstanda zaýyttar bıyl qansha munaı óńdedi

NUR-SULTAN. QazAqparat – Energetıka vıtse-mınıstri Áset Maǵaýovtyń aıtýynsha, bıyl eldegi zaýyttarda munaı óńdeý kólemi 17,1 mln tonnany qurady. Bul ótken jylǵy kezeńmen salystyrǵanda 5 paıyzdyq ósimdi kórsetip otyr, dep habarlaıdy QazAqparat tilshisi.

«2018 jyly munaı óńdeý zaýyttaryn jańǵyrtýdyń arqasynda óńdeý qýaty men tereńdigi artyp, K-4 jáne K-5 standarttary boıynsha munaı ónimderiniń joǵary sapasy qamtamasyz etildi. Ózderińiz biletindeı, jańǵyrtý jumystary 2015 jáne 2016 jyldary birneshe ret keıinge qaldyrylyp baryp, aıaqtalǵan bolatyn. «Qazmunaıgazben» birge jedeldetý boıynsha sharalar qabyldandy. 2017 jyly Atyraý jáne Pavlodar munaı óńdeý zaýyttaryn, 2018 jyly Shymkent zaýytyn jańǵyrtý aıaqtaldy», - dedi Áset Maǵaýov Ortalyq kommýnıkatsııalar qyzmetinde ótken baspasóz máslıhatynda.

Vıtse-mınıstrdiń aıtýynsha, 2019 jyldyń qorytyndysy boıynsha munaı óńdeý zaýyttarynda munaı óńdeý kólemi 17,1 mln tonnany qurap, ótken jylǵy osy kezeńmen salystyrǵanda 5 paıyz ósim kórsetken.

«Munaı ónimderin óndirýge kelsek, ótken jylmen salystyrǵanda benzın - 15 paıyzǵa, dızel otyny - 10 paıyzǵa, áýe otyny - 75 paıyzǵa ulǵaıdy. Buryn ishki naryq ımportqa táýeldi edi. Jekelegen munaı ónimderi boıynsha ımport úlesi 40 paıyzǵa deıin jetken kezder bolǵan. Qazir jaǵdaı basqasha. Bıyl óndiristi qoldaý úshin avtobenzın boıynsha eksport ashyldy. Aı saıyn shamamen 20-30 myń tonna avtobenzın eksportqa shyǵarylady. Jalpy, orta merzimdi perspektıvada ishki munaı ónimderi naryǵynda profıtsıt boljanýda», - dedi ol.