Qazaqstanda zańsyz kýálik berilgen 300-ge jýyq júk kóligi tirkeýden shyǵaryldy
ASTANA. QazAqparat - Ekologııalyq klasy zańsyz ózgertilgen 300-ge jýyq júk kóligi memlekettik tirkeýden shyǵaryldy, dep habarlaıdy QazAqparat QR Investıtsııalar jáne damý mınıstrliginiń saıtyna silteme jasap.
Mınıstrliktiń Tehnıkalyq retteý jáne metrologııa komıteti Qytaı Halyqtyq Respýblıkasynda shyǵarǵan júk kólikterine qatysty zańsyz berilgen kólik quraldary qurylymynyń qaýipsizdigi týraly kýálikterin tekserdi. Nátıjesinde 290 avtomobılge zańsyz berilgen kýáliktiń kúshi joıyldy. Bul avtomobılder shuǵyl túrde jol polıtsııasy organdaryndaǵy memlekettik tirkeýden shyǵaryldy.
Sondaı-aq, joǵaryda atalǵan kýálikterdi bergen «Avtotsentr-Nýrsan» JShS synaq ortalyǵynyń akkredıtteý attestaty keri qaıtarylyp alyndy.
QHR-da shyǵarylǵan Eýro-3, Eýro-2 ekologııalyq klasty júk avtomobılderine «Avtotsentr-Nýrsan» JShS synaq ortalyǵy Eýro-4 ekologııalyq klasty dáleldeıtin kýálikter bergeni tekseris kezinde anyqtaldy.
Avtomobılderdiń sáıkestendirý nómiri men (VIN) 290 kýáliktiń tizimi zańǵa sáıkes tıisti sharalar qabyldaý úshin QR ІІM Ákimshilik polıtsııa komıtetine jiberildi. Komıtet osyǵan uqsas quqyq buzýshylyqtardy anyqtaý jumystaryn jalǵastyrady.
