Qazaqstanda zańsyz baıyǵandar jaýapkershilikke tartylady
Agenttik tóraǵasynyń orynbasary Oljas Bektenovtyń aıtýynsha, búginde sybaılas jemqorlyqpen kúres salasyndaǵy úzdik tájirıbeni engizýge basymdyq berilip otyr. Oǵan qosa, Ekonomıkalyq yntymaqtastyq jáne damý uıymynyń keńesteri ári BUU Jemqorlyqqa qarsy konventsııasynyń talaby bar.
«Konventsııanyń 20-babynda zańsyz baıyǵany úshin jaýapkershilikti engizý mindeti jazylǵan. Qazaqstan atalǵan qujatty 2008 jyly ratıfıkatsııalaǵan bolatyn. Osyǵan baılanysty búginde biz osy ıdeıany jan-jaqty damytyp, basqa memlekettik organdarmen birlesip jumys istep jatyrmyz. 2020 jyly kirister men shyǵystardy jalpyǵa ortaq deklaratsııalaý engiziletini belgili. Sonyń aıasynda zańsyz baıyǵany úshin jaýapkershilikti engizgen durys dep sanaımyz. Máselen, sheneýniktiń shyǵystary kirisinen artyq bolsa, belgili bir jaýapkershilik qarastyrylýy shart», - dedi O.Bektenov memlekettik qyzmettiń jańa formatyn qalyptastyrýǵa arnalǵan paneldik sessııada.
Aıta keteıik, búgingi jıynda agenttik basshylyǵy Sybaılas jemqorlyqqa qarsy is-qımyl ulttyq bıýrosyn ońtaılandyrý nátıjesi de jarııalandy. Oljas Bektenovtiń aıtýynsha, osy ýaqytqa deıin Sybaılas jemqorlyqqa qarsy is-qımyl ulttyq bıýrosynda 250-ge jýyq basshylyq qyzmeti qysqartyldy. Budan bólek, artyq qurylymdar ońtaılandyryldy. Sonyń esebinen shuǵyl tergeý qyzmeti kúsheıtildi.
«Buryn Ulttyq bıýroda basshylar men qyzmetkerlerdiń ara qatynasy 1:2, ıaǵnı bir bastyqtyń qol astynda eki adam bolsa, qazir atalǵan kórsetkish damyǵan memleketterdiń deńgeıi - 1:8-ge jetti. Sosyn quqyq qorǵaýshylardy ashyq konkýrs negizinde jumysqa qabyldaıtyn boldy. Jalpy, Ulttyq bıýro boıynsha shamamen 1 mıllıard teńge únemdeldi. Osynyń nátıjesinde qyzmetkerlerdiń jalaqysy 2 eseden artyq ósti. Ol jerde prezıdenttik ósimaqy da bar. Oǵan taǵy únemdelgen qarjynyń ústemaqysy qosylady. Búginde Sybaılas jemqorlyqqa qarsy is-qımyl ulttyq bıýrosy eń joǵary jalaqy alatyn quqyq qorǵaý organy bolyp sanalady», - deıdi O.Bektenov.