Qazaqstanda zańsyz aınalymnan 35,3 tonna esirtki alyndy
ASTANA. QazAqparat - Sıntetıkalyq psıhoaktıvti zattardyń jańa túrleri jıi paıda bolýyna baılanysty Qazaqstanda tyıym salynǵan esirtki zattarynyń tizimin bekitý jeńildetiledi. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Biz zań jobasyn ázirleýdemiz. Oǵan sáıkes elimizde tyıym salynǵan esirtki zattarynyń tizimi zańmen emes, Úkimettiń sheshimimen bekitiletin bolady. Bul esirtkiniń paıda bolǵan jańa túrlerine qarsy shuǵyl áreket etýge jáne esirtkige qarsy zańnamalyq ıkemdi júıeni qurýǵa múmkindik beredi», - dedi Qasymov.
Osy rette mınıstr esirtkige qarsy zańnamanyń ózgerý sebepterin de jan-jaqty túsindirip ótti.
«Qazirgi ýaqytta sıntetıkalyq psıhoaktıvti zattardyń jańa túrleri taralýda. Olardyń túrleri jıi aýysyp otyrady. Sodan biz olardyń aınalymyn zańnamalyq tártippen jedel tyıym sala almaımyz. Sondyqtan olardy taratýshylar men tutynýshylardy ákimshilik nemese qylmystyq jaýapkershilikke tartý múmkin emes», - dedi ol.
Mınıstrdiń dereginshe, keden organdarynyń, shekara qyzmetteriniń jáne polıtsııanyń birlesken jumystaryna qaramastan kontrabandalyq jolmen elimizge aýǵan geroıni de kelip jatyr. Onyń birazy Qazaqstanda qalsa, qalǵany Reseıge shyǵarylady.
«Jyl saıyn polıtsııa organdary 3 myńnan astam esirtki qylmysyn anyqtaıdy, onyń 2 myńy satý faktileri. Ótken jyly zańsyz aınalymnan 35,3 tonna esirtki, onyń ishinde shamamen 120 keli geroın alyndy. Esirtki bıznesi salasyndaǵy 11 uıymdasqan qylmystyq top joıyldy», - dedi Qasymov.
