Qazaqstanda zańsyz aınalymnan 25 tonna 625 keli esirtki zaty tárkilendi - ІІM
ASTANA. QazAqparat - Aǵymdaǵy jyldyń ótken jeti aıynda elimizde 2123 esirtki qylmysy ashylyp, 3322 tulǵa ustaldy. Bul týraly búgin Іshki ister mınıstrliginde ótken baspasóz máslıhatynda Esirtki bıznesimen kúres departamentiniń basshysy, ádilet general-maıory Sultan Kúsetov málimdedi.
Departament basshysynyń aıtýynsha, jyl saıynǵy jospar boıynsha elimizde 1 maýsym men 30 qyrkúıek aralyǵynda «Kóknár» keń aýqymdy operatsııasy júzege asyrylyp jatyr. Operatsııa maqsaty kannabıs tobyndaǵy esirtki óndiristerin joıýǵa baǵyttalady.
«Keń aýqymdy shara barysynda zańsyz aınalymnan 25 tonna 625 keli ártúrli esirtki zattary alyndy, sonyń ishinde 86 kelisi - geroın, 115 keliden astamy - anasha. Qylmystyq jaýapkershilikke otyzdan astam uıymdasqan qylmystyq toptar tartylyp, esirtki tasymalynyń 15 arnasynyń joly kesildi, onyń úsheýi halyqaralyq tasymal bolyp otyr», - dedi Sultan Kúsetov.
