Qazaqstanda zańsyz araq jasaýshylar kóbeıdi - Memlekettik kirister komıteti
Memlekettik kirister komıtetiniń tóraǵasy Ardaq Teńgebaevtyń aıtýynsha, bul kórsetkish byltyr 6 mıllıondy quraǵan.
"Aktsızdeletin ónimniń zańsyz aınalymyn anyqtaý maqsatynda Memlekettik kirister komıteti alkogol ónimderiniń satylymyna reıd júrgizdi. Nátıjesinde alkogol ónimderin óndirý boıynsha 44 jasyryn tseh qyzmetine tosqaýyl qoıyldy, 4 mıllıonnan astam jalǵan esepke alý-baqylaý markalary tárkilendi. Osylaısha, taǵy 4 mln zańsyz araqtyń satylýyna jol bermedik", - dedi Ardaq Teńgebaev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, barlyq etıl spırti men araq óndirýshilerine tekserý júrgizilip, aktsızder men aıyppuldar boıynsha 200 mıllıon teńgeden astam qarajat esep alynǵan. 203 qylmystyq is qozǵalyp, myńnan astam ákimshilik quqyqbuzýshylyq anyqtalǵan.
"Alkogol ónimderin satýshylar arasynda eń kóp taraǵan quqyqbuzýshylyqtar - kóterme jáne bólshek saýdaǵa lıtsenzııanyń bolmaýy, zańmen bekitilgen ilespe qujattardy rásimdemeý jáne jalǵan esepke alý-baqylaý markalarymen zańsyz alkogol ónimderin shyǵarý", - dep túsindirdi Ardaq Teńgebaev.
Sondaı-aq, komıtet tóraǵasy arnaıy mobıldi qosymsha arqyly alkogol ónimderiniń sapasyn tekserý múmkindigin eske saldy. Etıketkalardy skanerleýge arnalǵan WIPON qosymshasy arqyly aktsızdik markany skanerlep, ónim týraly málimetterdi kórýge bolady .
