Zańsyz maınıngke qarsy júıeli jumystar júrgizildi: 1,3 mlrd teńge zalal anyqtaldy

ASTANA. KAZINFORM — 2024 jyldyń basynan beri jalpy 1,3 mlrd teńgege zalal keltirgen 17 qylmystyq is tirkelgen. Bul týraly Qarjylyq monıtorıng agenttigi málim etti.

Agenttiktiń dereginshe, eń jıi anyqtalǵan zańsyz maınıng fermalary Astana qalasynda — 6, Shymkent pen Qostanaıda — 3 jaǵdaıdan tirkelgen. Atalǵan ister aıasynda 642 myń AQSh dollary kólemindegi tsıfrlyq aktıvter tárkilendi. 

— Keıbir zańsyz maınıng fermalary elektr energııasyn urlaý arqyly jumys istegen (5 ferma). Olardyń tutynǵan energııa kólemi iri qalanyń shyǵynyna teń. Sondaı-aq fermalar ornalasqan aımaqtardaǵy turǵyndardyń tynyshtyǵyn buzý faktileri tirkelgen. Elektr energııasyn zańsyz tutyný saldarynan resýrstar naqty bıznes-jobalarǵa, ónerkásipti damytýǵa jáne áleýmettik nysandardy qamtamasyz etýge baǵyttalmaıdy, — delingen habarlamada.

Sonymen qatar, Memlekettik kirister komıtetiniń derekterine sáıkes, sońǵy úsh jylda maınıng salasynan bıýdjetke 17 mlrd teńgeden astam qarajat túsken. Bul salaǵa tıimdi retteý qajettigin kórsetedi. Agenttik Qazaqstanda maınıngpen aınalysý tek lıtsenzııa bolǵan jaǵdaıda ǵana ruqsat etiletinin eske salady. Zańdy qyzmet úshin jabdyqtyń sáıkestigi, energııamen jabdyqtaý sharty jáne salyqtyq mindettemelerdiń oryndalýy talap etiledi.

Zańsyz maınıng — qylmystyq jaýapkershilikke ákelip soǵady, eldiń ekonomıkalyq qaýipsizdigine nuqsan keltirip, energııamen jabdyqtaýdaǵy aqaýlarǵa sebep bolady. Agenttik kásipkerler men azamattardy zańsyz maınıngpen aınalysýdan bas tartýǵa jáne tsıfrlyq aktıvterdiń ashyq naryǵyn damytýǵa shaqyrady. 

Eske sala keteıik, Astanada zańsyz maınıngpen aınalysqandar ustalyp, 900 mln teńgeden astam múlik tárkilengenin jazǵan edik.