Qazaqstanda zańsyz ań aýlaǵandarǵa qansha aıyppul salynady
ASTANA. KAZINFORM – Qazaqstanda erekshe qorǵalatyn tabıǵı aýmaqtarda ańshylyq qaǵıdalaryn buzǵan azamattarǵa 70 AEK mólsherinde aıyppul salý nemese eki jylǵa deıin ań aýlaý quqyǵynan aıyrý jazasy qarastyrylǵan, dep habarlaıdy Orman sharýashylyǵy jáne janýarlar dúnıesi komıteti.
Vedomstvo málimetinshe, tıisti ruqsatsyz, belgilengen merzimnen tys, tyıym salynǵan aýmaqtarda nemese zańsyz tásildermen ań aýlaý zańnamada kózdelgen jaýapkershilikke ákep soǵady.
Ákimshilik quqyq buzýshylyq týraly kodekstiń 382-babynyń 3-bóligine sáıkes, erekshe qorǵalatyn tabıǵı aýmaqtarda ańshylyq qaǵıdalaryn buzǵan jeke tulǵalarǵa 70 AEK mólsherinde aıyppul salý nemese eki jylǵa deıin ań aýlaý quqyǵynan aıyrý kózdelgen.
Sonymen qatar quqyq buzýshylyq jasaýǵa paıdalanylǵan zattar men quraldar tárkilenedi.
– Zańsyz ańshylyq janýarlar dúnıesine qaýip tóndirip, tabıǵı tepe-teńdikke zııan keltiredi, – dep eskertti komıtet.
Vedomstvo azamattardy ańshylyq qaǵıdalaryn saqtaýǵa jáne jabaıy tabıǵatqa jaýapkershilikpen qaraýǵa shaqyrdy.
Aıta keteıik, buǵan deıin Shyǵys Qazaqstan oblysynyń Zaısan qalasynda zańsyz ańshylyqqa qatysy bolýy múmkin degen kúdikpen 10 adam ustalǵan edi. Olardyń toǵyzy shetel azamaty ekeni habarlandy.
